euskalkultura.eus

Trelew, Argentina. Irratsaio berri bat emendatu zaio euskal diasporak uhinetan duen tarteari. Trelew hiritik, Patagonia erditik, eta Chubut ibaiaren beheko Haraneko Euskal Etxearen eskutik, “Euskal Berria” emititzen hasi da. Irrati proiektu berriaren lantaldea haraneko Euskal Etxeko lehendakari Natalia Suárez Caminoak, idazkari Milagros Ibarbiak, kultura arduradun Ignacio Esquirozek eta esatari Andrea Criadok osatzen dute.

“'Euskal Berria' deitzea erabaki genuen, ez bakarrik euskal berriengatik, baizik eta Basalduak Patagoniako Chubuten garatu nahi izan zuen izen bereko proiektuaren oroimenez", azaldu dio EuskalKultura.eus-i Iñaki Esquiroz musikari eta luthierrak Florencio Basalduari erreferentzia eginez. Basaldua etorkin bilbotarrak (1853-1932), euskaldunek osatutako kolonia bat, Euskal Herri berri bat osatu nahi izan zuen hemen duela ehun bat urte, galestarrak eredu harturik, Britainiar Inperiotik ihes egin eta Chubuten zenbait belaunalditan biziera eta hizkuntza gorde zituen galestar komunitatean inspiratuta, halako kolonia euskaldun bat amestuz Chubut probintzian.

“Euskal Berria” programa 'Desde las Raíces' (erroetatik) izeneko proiektuaren barruan kokatzen da, Chubut Irratiak kolektibitateei eskaintzen dien ekimena. Astelehenetik ostiralera, gizatalde bakoitzak 30 minutuko tartea du bere irratsaioa garatzeko. “Argentinako euskal migrazioari buruz hitz egin nahi dugu, Patagoniako migrazioari begira eta erreferentziazko figura batzuk berreskuratuz. Horrez gain, gure euskal etxekoez gain, inguruan ditugun Puerto Madryngo Etorritakoengatik eta Comodoro Rivadaviako Euskal Echea elkarteetako nobedadeak partekatuko ditugu. Bertako eta nazioarteko pertsona nabariei elkarrizketa egingo diegu, gure kultura eta hizkuntzaz arituko gara eta, jakina, musika euskaldun asko partekatuko dugu”, azaltzen du gogo biziz Esquirozek.

Euskal Berria zuzenean entzun daiteke asteartero, 15etan, AM580 LU20 Radio Chubut irratian, eta euren webgunearen bidez https://radiochubut.com/online.

Zorionak Haraneko Euskal Etxeko lagunak!