euskalkultura.eus

Ekitaldia hasteko, Errekatarrak Abesbatzak, Euskal Abendaren ereserkia / Gora ta Gora interpretatu zuen. Ondoren, ‘Ai Zer Plazera’, Patxi Saiz-en bideoa eman zen. Musikarekin jarraitzeko, Txistu eta Dantza irakaslea den Valeria Magliocchetti musikariak Euskal Herrian euskaraz (instrumentala, txistu eta danbolina) eta Ikusi Mendizaleak (instrumentala, txistu eta panderoa) jo zituen. Euskara ikasleek ere izan zuten beren partaidetza Euskal Etxea-ko jaian. Beraiek egindako ‘Nola esaten da euskaraz’ bideoa aurkeztu zuten Natalia Hormazabal irakasleak lagunduta.

Festaren bigarren zatian, kantariak gailendu ziren San Nicolaseko Euskal Etxeak antolatutako Abesbatzen I. Topaketan. Emanaldiari hasiera emateko, Errekatarrak Abesbatzak, Jorge Menna zuzendari, Solo el Amor (Silvio Rodriguez), Ikusi Mendizaleak (Euskal Folklorea), Andre Madalen (Euskal Folklorea) eta Cuando el hombre va en camino (Castillo-Sará) abestu zituen. Jarraitzeko, San Genaro Abesbatzak, Diego Petrelli zuzendari, honako kanta hauek interpretatu zituen: Cuando llegue el alba, Naranjitai, El dominguero eta Doña Ubenza. 

Azkenik, Rosarioko Unibertsitateko Coralia del Sol Abesbatzaren txanda izan zenean, La estrella azul, Chacarera Santiagueña, Honrar la vida, El Alcaravan, eta Amalia Rosi entzun ahal izan ziren euskal etxeko areto nagusian. Topaketaren hurrengo zatira pasatu baino lehen, talde guztiek Leon Gioecoren Cinco siglos igual kantatu zuten.

Gau aldera, agapea eskaini zitzaien gonbidatuei. Goi mailako ‘etxeko sukaldariek’ txipiroiak gurin eta arrozarekin prestatu zuten.