euskalkultura.eus

Jose C. Paz, Argentina. Pertsonaia, Jose Clemente Paz, 1842. urtean jaio zen, Buenos Aires hirian, izen handiko familia baten barruan. Heziketagatik garaikideen artean gailendu zen Paz jaunak La Prensa egunkaria sortu zuen 1869an eta politikari eta diplomatiko aritu zen Madril eta Parisen. Jardunbide honi erreparatuz, seguruenik, bere izena jarri zien Jose Vicente Altubek Argentinako hiriburutik 35 kilometro ipar-mendebaldera dauden lur hauei, egungo José C. Paz hiriari.

Joan den uztailaren 13an ehun urte bete dira izendatzea burutu zenetik eta Jose C. Pazeko komunitateak urtemuga ospatu zuen. Ekitaldia plaza nagusian egin zen, eta lore sorta utzi eta hitz batzuk esan ondoren, Toki Eder-ek Ohorezko Ardoa eskaini zuen bere instalazioetan. Lagun ugari bildu ziren erakundearen egoitzara omenaldian parte hartzeko, tartean ‘Jose Altube’ Museoko eta ‘Nelly Altube’ Abesbatzako kideak, Leones, Rotary eta El Porvenir Klubetako ordezkariak, ‘Sarmiento’ Elkarte Japoniarreko agintariak, hiriko suhiltzaileak eta euskal etxearen laguntza jasotzen duten elkarteko kideak. Aipatzekoa da Carlos Urquiaga alkatea eta Jose V. Altube oñatiarraren ondorengoak ere bertaratu zirela ekitaldira.