Sydneyko Gure Txoko elkarteak Diada eguna goiztiar ospatu zuen igandean, euskaldunak eta katalanak bilduz

2012/09/12

Jendez mukuru egon zen Gure Txokoren frontoia, Diada eguneko bazkarian (argazkia SydneyEE)

PUBLIZITATEA

Hirugarren urtez jarraian Sydneyko Gure Txoko elkarteak ateak zabal zabalik jarri zituen elkarteko lagun katalanei ongi etorria egin eta elkarrekin Diadaren eguna, Kataluniako jai nazionala, ospatzeko. Iragan igandean egin zuten festa, nahiz eta, berez, Diada atzo asteartea ospatu zen Katalunian. Iaz bezala, giro bikaina izan zuen jaiak eta elkartea jendez lepo bete zen (bazkarirako tiketak agortuta zeuden aspalditik). Vilaweb albistari digitala bezalako komunikabide katalanetan ere izan du oihartzuna Sydneyko jaiak.

Sydney, Australia. Sydneyko Euskal Etxea hiriko kataluniarren topagune ere izan zen iragan igandean, elkartearen frontoian ospatu zelako Diada edo Kataluniako jai nazionala. Ofizialki, Diada atzo ospatu zen Katalunian --eta alimaleko jendetza bildu zuen Bartzelonan, arratsaldeko manifestazio politikoa, Independentzia aldarrikatuz, askok hiriko handiena gisa kalifikatu dutelarik, milioi bat eta bi milioi pertsona arteko partaidetzarekin, iturrien arabera, Kataluniaren estatutasuna eskatzeko-- baina Australiako katalanek eta euskadunek ospakizuna igandera aurreratzea erabaki zuten, asteburuan ahalik eta jende gehieni parte hartzeko aukera emateko.

Eta parte hartu zuten, bai, gogotsu gainera! Ehun bat lagun bildu ziren Gure Txokora, euskaldunak zein katalanak, australiarrak... eta elkartearen frontoian egin zen bazkariaz gozatu zuten. Aipatzekoa da bazkarirako tiketak aldez aurretik zeudela agortuta. Gure Txokon jai hau antolatzen den hirugarren urtea da jada, eta edizio honek eta aurrekoek izan duten erantzun ona ikusirik, datozen urteetan ere Diada euskal-katalanik izango dela ziurtatu daiteke, batez ere ospatu zen euforia giroa ikusita.