euskalkultura.eus

euskal diaspora eta kultura

Albisteak rss

Euskal ekimenak Australian: Aberri Eguna Sydney-en eta Gernikari buruzko erakusketa Melbournen

2009/04/22

Okendo herriko Josu Kastresanak akordeoiaren soinuekin alaitu zuen Sydneyko Aberri Eguna (argazkia SydneyEE)
Okendo herriko Josu Kastresanak akordeoiaren soinuekin alaitu zuen Sydneyko Aberri Eguna (argazkia SydneyEE)

PUBLIZITATEA

Apirilak euskal Diasporan bi gai nagusi izaten ditu urtero, alde batetik Aberri Eguneko ospakizunak, eta bestetik Gernikako 1937ko bonbardaketako biktimen oroimenez egiten diren ekitaldiak. Australiako euskal komunitateak ere data esanguratsu hauek gogoratu nahi izan ditu eta Sydneyko Gure Txoko Euskal Etxean Aberri Eguna ospatzen zuten aldi berean, William Kelly artistak "Bakeari monumentua: Gernika eta espainiar guda zibila" erakusketa inauguratu du Melbournen. Ekitaldian euskal komunitateko kide ugari izan ziren.

Sydney, Australia. Sydneyko Gure Txoko Euskal Etxeak Aberri Eguna ospatu zuen joan den apirilaren 4ean , elkartean egoitzan egin zen jaiarekin. Eguna, urtero legez, Centennial Park-en egin behar zen piknik batekin ospatu nahi zuten Sydneyko euskaldunek, baina euri arriskua zela eta jaia euskal etxearen egoitzara aldatu behar izan zuten, Carlos Orue bazkideak EuskalKultura.com-i azaldu dionez.

Jaiak Euskal Herritik etorritako bisitari bat ere izan zuen, Josu Kastresana, Arabako Okendo herrikoa. Kastresana Australian egonaldi luzea egiten ari da eta jaian bere akordeoiaren soinuei esker ez zen dantza eta kanturik falta izan jaian.

Gernika Melbournen

Bestalde, apirilaren 6ean Melbournen Gernikaren bonbardeketaren 72. urteurrena gogoratu zuten, William Kelly artistaren "A monument to peace: Guernica and the Spanish Civil War"  erakusketari esker. Inaugurazio ekitaldian Australiako euskal komunitateko kide ugari izan ziren, Euskal Herriarekin harreman estua duen Kellyri babesa eman eta erakusketa ikusteko gogoz.

Kellyk bere lanetan giza eskubideak eta bakea bezalako gaiak sarri jorratzen ditu eta Gernikan eta bertako Bakearen Museoan hainbat erakusketa eta proiektu egin ditu. Izan ere, azken erakusketa honetako lan nagusiena --'Gernikarekin solasaldia' izenburua duten bi pankarta handi-- aldi berean Gernikako Udal Kultur Etxeko fatxadan ere dago ikusgai. Lehendabiziko pankartan Kellyk Picassoren 'Gernika' maisulaneko irudiak biltzen ditu, eta bigarrenean gaur eguneko herriaren ikuspegia ematen du.

Gernika en Melbourne

[William Kelly 'Gernikarekin solasaldia' lana osatzen duten bi pankarten artean, Melbourne-ko erakusketan (argazkia EuskalEtxeak.net)

Informazio gehiago William Kellyren webgunean: www.williamkelly.com.au.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia