Salto, Uruguai. 'Saltoko Euskaldunen Taldea' Euskal Etxeak eta herri bereko ‘Treinta y tres’ Klubak sortu zuten iaz ‘Baskos 33’ Futbol Taldea. 2019an ibilbide ezin hobea egin ondoren Senior Ligako (45 urtetik gorako jokalari amateurrena) ‘A’ kategoriara igo da eta abuztuaren amaieran bere lehenengo partida izan zuen liga berrian, emaitza bikainekin.
Orain, igandero izango dituzten partidetarako entrenatzeaz gain, jokalariak gogor ari dira lanean, Euskal Etxeko kideak lagun, laster euren futbol zelaia estreinatu ahal izateko. Gogora dezagun esku artean dituen proiektuen artean, Saltoko Euskaldunen Taldea Kirol eta Gizarte Gunea ari dela eraikitzen. Bertan futbol zelaiaz aparte, txokoa (erretegi eta jendea biltzeko areto bat), kanpina, aldagelak eta, ororen buru, kirola egiteko beste hainbat aukera eskainiko dizkio komunitateari.
Euskal Etxeak gogor segitzen du lanean, bestalde, Euskal Herriko Unibertsitatearekin eta Saltoko Udalarekin batera, ‘Uribarri eta Gernika Kultur eta Memoria Gunea' proiektuan; "Harriague Upeltegia, Tannat-en Zero Puntua" Kultur Gunean kokaturik erabat bideratuta dago. Bertan oroitarri bat eraikiko dute laster, lauburu tankera duena hain zuzen, harrizko arkuen teknika erabiliz.
Lagun bati bidali
Komentarioa gehitu
