euskalkultura.eus

Saladillo, Argentina. Eguraldi lagun, joan den azaroaren 8an, igandean, Saladillotarrek jolas egun batean parte hartzeko aukera izan zuten. Arduradunak, bertako Itxaropen euskal etxeko kideak izan ziren, Udaletxeko Kultura eta Kirol Departamentuek lagunduta. Arratsaldeko 4etatik aurrera eta Nuestra Señora del Carmen izeneko parkean, makina bat herritar, umeak, gazteak eta helduak, bildu ziren bai jolasteko bai ikuskizunak ikusteko.

Alde batetik, euskal jolas tipikoak eta herri kirolak antolatu ziren, txinga proba, sokatira eta lokotx-bilketa, batzuk aipatzeagatik. Beste alde batetik, aurtengo helburua komunitate osoa integratzea izan denez, beste motatako ikuskizunak ere ikusi ahal izan ziren. Deigarriak izaten diren estatua bizidunek, mago batek eta Saavedrako Murga Revoltosos delako taldeak ere euren lekua izan zuten jaian.

[Lokotx-bilketa, ekitaldian egin zen jolasetako bat]

'Egun honen helburua euskal ohiturak, hau da, janzkera, lan egiteko era, jolasak eta musika zabaltzea da', adierazi zuen euskal etxeko nagusia den Hector Altamirak. 'Herriko euskal komunitatearentzat jai hau oso garrantzitsua izan da, Argentinako euskal etxe guztiek daukate eta urteko festa bat. Jai honekin guk geuk ere gurearen hazia ezarri dugu'. Arratsalde osoan zehar, euskal etxeko kideak tabernaz ardura ziren.