euskalkultura.eus

Río Cuarto, Argentina. Eduardo Aguirre buru duen batzordeak hasitako ohiturari eutsiz, Rio Cuartoko Gure Ametza Euskal Etxeak bere bazkide zaharrenak saritzen jarraitzen du eta testuinguru horretan omenaldi berezi bat egin die pasa den asteko asteazkenean euskal etxearen alde lan egindako Esther Ansorena, Walter Patatxo Asnal, Josefina Bilbao eta Elva Viano Zuza bazkide fundatzaileei, diploma bana eskuratuz.

[Sukaldearen izen berria erakusten duen plaka desestali zen zeremonian (argazkia EE)]

[Euskal etxeko agintariak eta Joseba Etxarri Edurne Bilbao omenduarekin (argazkia EE)]

Zeremoniaren barruan, sukaldearen izen berria daraman plaka bat desestali zen. Gure Ametza-tik azpimarratu dutenez, euskal etxeko sukaldari gisa hainbat urtez eginiko lana eskertzeko ipini diote Edurne Bilbao izena sukaldeari. Edurnek sukaldaritza ekintza guztietan hartu du parte euskal etxea sortu zenetik, musutruke eta euskal sentimenduarekiko konpromiso paregabekoa erakutsiz. Edurne,  Josefina, Imanol eta Jose Bilbao, azken bi hauek hilik, Gure Ametza-ren fundazioan partaidetza handia izan zuen familia batekoak dira”.

Baina jardunbide luzea dutenak ez ziren gaueko saridun bakarrak izan. Izan ere, eta etorkizuneko oinarriak sendotze aldera, euskal etxean urtebete daramaten txikiei ere eskuratu zitzaizkien diplomak.

Euskal Diasporari buruzko hitzaldia

Argentinako egonaldia baliatuz, 2013ko Euskal Aste Nazionalaren egoitza izan zen Villa Maria hiritik gertu dauden beste euskal etxe batzuk bisitatu zituen joan den astean EuskalKultura.com buletin honen zuzendaria den Joseba Etxarrik. Biraren baitan, omenaldiaren partaide izateaz gain, Euskal Diasporari buruzko hitzaldia eman eta Gernikako Arbolaren Kimua eta Euskal Herria Plaza bisitatu zituen Joseba Etxarrik. Eta Eusko Jaurlaritzak bidalitako fresatzeko makinak erabiltzen dituen Eskola Industrial-ean ere izan zen.

Arbolak landatzea Euskal Herria Plazan

[Gure Ametza eta Wichan Ranquen Komunitate Mintegiko lagunak Euskal Herria Plazan (argazkia EE)]

Gogora dezagun Rio Cuarto izeneko ibaiaren ertzean dagoen euskal enparantzan 2010eko abuztuan inauguratu zela euskal kultura sustatzeko eremu bihurtu nahi duen 'Euskal Herria Enparantza'.