euskalkultura.eus

Donostia-San Sebastian. Euskararen Nazioarteko Egunaren karira Eusko Ikaskuntzak ENE Sariaren zortzigarren edizioa deitu du. Errekonozimendu honekin Eusko Ikaskuntzak Diasporarekin lotuta euskararen alde egindako lan ona aitortu eta saritzea du helburu. Aurreko edizioetan honakoak izan dira sarituak:

-2012. Union Vasca Elkartea. Bahia Blanca, Argentina. 
-2011. Madrilgo Euskal Etxea. Madril, Espainia.
-2010. Sustraiak-Erroak Elkartea. Paris, Frantzia.
-2009. North American Basque Organization (N.A.B.O.). Amerikako Estatu Batuak.
-2008. Bordeleko Euskal Etxea. Bordel, Frantzia.
-2007. Bartzelonako Euskal Etxea. Bartzelona, Espainia.
-2006. Artaburu Euskaltzale Elkartea. Mar de Plata, Argentina.

Sari honetarako hautagaitzak aurkezteko epea irekita dago eta edonork aurkez dezake bere ustetan saria eta aintzat hartzea merezi duen elkarte edo erakunderen bat. Euskal Herritik kanpo euskara sustatzeko lanetan diharduen edozein erakunde izan daiteke hautagai.

Epea aurki amaituko!

Hori bai, hautagaitzak aurkezteko epea aurki amaituko da: azaroaren 25eko gaueko 24:00etan (Euskal Herriko orduan). Beraz, bururan hautagairen bat baduzu, ibili bizkor!

Hautagaitzak aurkezteko hauxe da egin beharrekoa: erakunde horren jardueren laburpen bat bidali Euskosarera (info@euskosare.org). Gehienez A-4 neurriko bost orri izango ditu, eta bertan Epaimahaiak kontuan hartzeko interesgarri izan daitezkeen xehetasun guztiak azalduko dira: erakundearen sorrera data; euskararen inguruan urtean burutzen dituzten ekintzak; ikasle kopurua, hala badagokio; argitalpenak eta antzekoak; lorturiko goraipamenak eta sariak; eta abar.

Euskararen Nazioarteko Eguna

Sariaren irabazlearen izena Euskararen Nazioarteko Egunean jakinaraziko da. Saria elkartearen lan onaren onarpen publikoa eta Nestor Basterretxeak ENErako diseinatu zuen anagramaren burdin eta altzairu herdoilgaitzezko erreprodukzio bat izango da.

Sari honetaz gain, Eusko Ikaskuntzak beste zenbait ekimen jarri ditu abian Euskararen Nazioarteko Egunaren karira. "Euskara Pil-pilean" egitasmoan, esaterako, euskara mintzatzen eta ikasten laguntzeko internet bidezko sarea osatu nahi du elkarteak. Bertan izena ematen dutenen artean opari andana zozketatuko dituzte. Anima zaitez eta parte har ezazu!