euskalkultura.eus

Rio Cuarto, Argentina. Aguirreren hitzetan, eskertzeko eta "pozik egoteko modukoa da gure elkarte eta gizataldearentzat Cordobako Probintziako Gobernuak onartu eta onespena eman izana geure plaza tematiko proposamena. Esker ona nahi diogu azaldu Probintziari geure elkartearekiko izan duen keinuagatik", esaten zuen Rio Cuartoko 'Gure Amezta'ko kideak.

[Cordobako Probintzia eta Gure Ametza Euskal Etxeko kideen arteko bilera]

Probintziako Gobernuak Euskal Etxeak aurkeztutako 'Euskal Herria Plaza' izeneko proiektua aztertu zuen, euskal gaiko plaza tematikoa sortu eta lur-eremu publikoetan eraikitzearren. Testuinguru honetan bilera egin zen Euskal Etxean, bertaratu zirelarik besteak beste, Probintziaren izenean, Carlos Gutierrez Elikadura, Abelzaintza eta Nekazaritza ministroa mintzatu zen; eta Gobernuaren Eskualde Ordezkaria, Marisa Arias. "Oso interesgarri"tzat jo zuten biek Euskal Etxetik egindako proposamena.

[Cuarto ibaiaren ondoan epe laburrean 'Euskal Herria Plaza' bilakatu den inguruko irudiak]

Gutierrezek adierazi zuen "euskal gizataldeak Cuarto ibaiaren ertzean plaza tematiko bat eraikitzeko duen proiektu eta asmoa bat datoz(ela) erabat gobernadoreak eta gure ekipoak ibaiari buruz dituen planekin, gero eta argiago baitago hiria ibaiari begira behar dugula ipini".

Horregatik guztiagatik Probintziako gobernuak erabaki du "aipatu lur eremua 50 urterako uztea Euskal Etxearen kudeaketaren eskuetan, horri dagokion prozesu administratibo osoa igaro ondoren, jakina. Berdegunea Juan Filloy Zubiaren hegoalde sarrera ondoan dago kokatua eta berau sortzea, egitea eta kudeatzea euskal gizataldearen eskuetan egon da.

"Bada hemen hirian euskaldunentzat ikur-esanahi handia duen zerbait:  Gernikako Haritza, Roca Plazan kokatuta dagoena, katedrale aldamenean. Baina ez geneukan leku honek dauzkan ezaugarriak eta tamaina", bukatu zuten Eduardo Aguirrek proiektuari buruzko azalpenak emanik.