euskalkultura.eus

Macachin, Argentina. 2010. urte hasieran berri txarrak heldu zitzaizkigun La Pampa probintziako Macachin herritik. Gogora dezagun, arazo ekonomikoak zirela eta, izen handiko Euzko Alkartasuna hotelaren jabeak hotela itxi eta langileak kalean utzi zituela. Egoeraz jabetu bezain pronto, euskal etxeko batzordeak bere gain hartu zituen ixtearen ondorioak eta zegokien kalte-ordaina ordaindu zien.

Bi urte pasa eta gero, hotelak kontzesiodun berria du eta berritze lanak bukatuta, goi mailako hotel bihurtuko da. “Kontseziodun berria Macachingoa bertako da. Oscar Prosper-ek Turismo eta Ostalaritza ikasi zuen eta Cordoban eta Mendozan trebatu zen. Ziur gaude primerako harrera emango diela bidaiariei”, azaltzen digute Macachindik.

[Macachingo Euzko Alkartasuna hoteleko logela berriak (argazkia EE)]

Hotelaren inaugurazioa eta irekitzea

Urrats handia eman dute hotelaren arduradunek azken bolada honetan, eta horren berri eman nahi izan zioten komunitateari. Kari horretara, inaugurazio ekitaldia egin zuten hotelaren instalazioetan. Politika arloko agintariak eta Argentinako euskal etxe anitzeko ordezkariak bildu ziren Macachinen bilkuran parte hartzeko.

[Hotelaren inaugurazioan burutu zen Mus Txapelketa (argazkia EE)]

Estreinaldia azaroaren 18an hasi zen elkarretaratze batekin eta 19an, larunbatean, jarraitu zuen Mus Txapelketarekin. “Mar del Plata, Rosario, Bahia Blanca, Carhue, Santa Rosa eta Buenos Aires-eko lagunek lagundu ziguten egun garrantzitsu honetan eta guztiei eman nahi dizkiegu eskerrak. Gonbidatuek logela berrietan pasatu zuten gaua. Hala ere, hotela oraindik ez dago publikoari irekita. Gauza txiki batzuk egin behar dira oraindik, baina oro har gutxi falta da. Asmoa da urtea amaitu aurretik betiko martxan jartzea”, jakinarazi digute Euzko Alkartasuna-ko kideek.

[Otorduak hoteleko kiroldegian izan ziren (argazkia EE)]

[Muslariak Gernikako kimuaren gerizpean (argazkia EE)]

“Mus Txapelketa igandera arte luzatu zen eta irabazleei diru saria eta eskuz egindako mateak eskuratu zitzaizkien. Baina dudarik gabe sari handiena lagunen artean ospatzeko aukera izan da. Oso ondo pasatu genuen, eta oso gustura ibili ziren gonbidatuak gure etxe berrian. Denbora gutxi barru publiko orokorrak ere gozatu ahal izango da luxuzko hotelaz”, adierazi dute Macanchingo euskaldunek.