euskalkultura.eus

Aldude, Nafarroa Beherea. Kontent amaitu dute Noka talde euskal-kaliforniarreko kideek Euskal Herrira egin duten bidaia. Ez zen aise hirukoa osatzen duten Cathy, Andrea eta Begoñaren datak elkarrekin ados jartzea, laneko eta familiarekiko eguneroko obligazioek agintzen baitute, eta azkenean soilik Andrea eta Begoña etorri dira Nokaren izena Euskal Herriko zenbait plazatan defenditzera. Izan ere, truke gisa planteatu zuten itzulia, iragan eguberrietan Euskal Herriko Kantiruki taldea bidaiatu baitzen Kaliforniara, hauek ere euskal kantuz, eta orain Nokaren txanda zen. Banan bana, ibiliak ziren lehenago Euskal Herrian Andrea eta Begoña, baina talde gisa Nokaren lehenengo bidaia izan da Estatu Batuetatik kanpo.

Euskal Herrian, lehenik Erratzun eta Larrañen aritu ondotik, Kanboko ezker paretan aritu ziren uztailaren 12an eta Aldudeko Alfaro ostatuaren arrazabaltzean uztailaren 13an, ondoren16an Kaliforniarako bidea hartzeko. Aldudekoan harrapatu zituen EuskalKultura.com-ek, seguruenik euren emanaldi informalenean, Alduderentzat besta egun berezia baitzen, hiru urterarik goiti itxita egon ondoren egun horretan arrazabaldu baitzen herriko Alfaro ostatua, 18 urte dituen eta etxeko alaba den Maika Alfaro aldudetar gaztearen ardurapean. Alduderen geroari eta herri bizitasunari on besterik egin ez dion gertakari honekin bat egin zuten Nokakoek, bertakoek gonbidaturik. Hona Alfaro ostatuan eskaini zuten 'Aberriaren Mugak' kantu ezagutua, Nokaren ahotsean.

Emanaldiaren ondotik, kantari euskal-kaliforniarrak EuskalKultura.com-ekin solastu ziren Alduden, lehenik hitz batzuk ingelesez, ondoren euskaraz. Hona bigarren bideo bat, non Andrea Miren Bidart Oteizak eta Begoña Echeverriak euren berri eta Euskal Herrira egindako bidaiaren xehetasun eskaintzen diguten. Hauxe bideoa:

Lotura interesgarriak

Noka taldearen webgunea
www.chinoka.com

'Aberriaren mugak'en hitzak, partitura eta MP3a
HABEren Ikasbil.net webgunean