euskalkultura.eus

Vitoria-Gasteiz. Eusko Jaurlaritzak Lagun Onari saria emango dio Amerikako Estatu Batuetako Nevada Estatuari, "euskal herritarrei egindako harreragatik" eta "adiskidetasuna eta euskal kultura, nahiz balore akademikoak" modu eredugarrian sustatu dituelako. Hala onartu zuen joan den asteartean egin zuen Gobernu Kontseiluan.

Patxi Lopez lehendakaria bera izango da saria Nevadako gobernadore James Gibbons-i emango diona, uztail honen azken astean Estatu Batu Mendebaldera burutuko duen bidaia ofizialean. Lopezek Nevada-Renoko Unibertsitateko (UNR) Euskal Ikasketa Zentroa bisitatuko du, munduan Euskal Herritik kanpo dagoen goi-ikastegi eta liburutegi handiena duen instituzioa delarik Nevadako Unibertsitatea, Renoko kanpusean.

Duela bost urte, Ibarretxe lehendakaria izan zen ondoko estatuari, Idahori, sari bera eskuz-esku eman ziona, orduan ere Estatu Batuetara Jaialdia zela-eta egindako bisitan. Jaialdi 2005eko programaren baitan ipinitako ekitaldi hura Idahoko Kapitolioko eskilara luzeen erdian burutu zen, Euskadiko eta Idaho Estatuko agintari gorenenak partaide.

Bestalde, Jaurlaritzak Lan Onari saria Patty Miller euskalamerikarrari ematea erabaki zuen baita ere joan den astearteko bileran. 1993az geroztik Boise Idahoko hiriburuko Euskal Museo eta Kultura Etxeko zuzendaria da Patty Miller eta "bere ibilbide profesional eta gizatiarrarengatik, ekimen izpiritua eta kulturari eskainitako bizitza osoagatik" emango dio, exekutiboak berak ohar batean adierazi duenez.