euskalkultura.eus

San Frantzisko, AEB. NABOk, Ipar Ameriketako euskal elkarteen federazioak bere azkeneko bileran izendatu zuen, San Frantziskon, erakundeak sekula izan duen lehenengo Musika Egitarau Zuzendaria, lan hori betetzeko Mikaela Goicoechea gazte wyomingdarra izendatuz, eta orain, Estatu Batuetako leku askotan mugikortasuna mugatuta dagoenean eta euskal aktibitateak ere bertan behera utzita, proposamen berri batekin plazaratu dira NABO eta Mikaela, Foku Musikala deitu duten programarekin, norberaren etxeko itxialdian dauden euskal etxeetako kideei eta euskaldun eta euskaltzaleei oro har proposamen partehartzaile interesgarri hau eginez, bakoitzak bere etxeetik gara dezan.

Unibertsitatean kantari eta musika irakaslea izatearren ikasten ari den Mikaelak beheko bideoan azaltzen duenez, proposamenak aurre egin nahi dio egungo osasun-larrialdi egoerari eta euren etxeetan, ohiko euskara, euskal dantza edo bestelako klase, praktika edo saioetara joan ahal izan gabe egon beharra daukaten haur, gazte zein helduei. NABOko Euskara, Udaleku eta Musika alorrek elkarrekin plazaratzen duten ekimena da, eta NABOren Astero agerkariaren bidez --eta NABOren webgunean ezarrita-- aldiro euskal musika baliabide bat hautatzean datza proposamena, kantu bat esaterako, kantuaren bideo batekin, hitzekin eta euren esangurarekin, azalpena eta, esaterako, karaokearekin, ikasten eta partekatzen joatearren.

Aurrera ekimena, ongietorria MIkaela Goicoechea eta bere ekarpenari, eta arrakastatsua eta behin eta berriro partekatua izan dadila, Mikaelak berak proposatu bezala, haur, gazte, heldu eta beteranoenen artean ere!

Lehenengo hautatutako kantua "Haurrak ikas zazue" da, Mikaelak ongi ezagutzen duen kantua. Hona aurkezpen bideoa:

Mikaela Goicoechea bere proposamena azaltzen

Lehenengo astea, lehenengo kantua: Haurrak ikas zazue

Bikarren kantua: Aldapeko

-Elkarrizketa Mikaela Goicoecheari EuskalKultura.eus-en, orain lau urte, 16 urte zituela
-Mikaela Goicoechea, emanaldia Rock Springs-en, 19 urterekin, 2019an
-NABO Udalekuaren azkeneko edizioa, Mikaela Goicoechea haurren kantu irakasle (ikus bideoak)