Tresnen argazki erakusketarekin hartu zuen parte Azulgo Gure Txokoa-k 'Museoen Gauaren' ibilbidean

2011/11/11

'Museoen Gaua' Azul-en

PUBLIZITATEA

'Museoen Gaua' erakustaldiaren 6. edizioa gauzatu zen aurten Buenos Aires probintziako Azul hirian eta bertoko euskal etxea, beste hainbat kultur erakunderekin batera, proposamen honen partaidea izan zen. Urriaren 1 eta 2an, Gure Txokoa-ren egoitzako ateak irekita egon ziren gaueko ibilbidea egin zutenentzat eta etxeko kideak Euskal Herriari buruzko informazioa eskuratu zieten bisitari guztiei. Komunitateari begira, beste ekintza bat antolatu zuten euskaldun azuldarrek pasa den hilean. Urriaren 26an eta "Que par Che" antzerki taldearekin 'Barre Tailerra' eman zieten ehun bat laguni.

Azul, Argentina. Berlinen jaio zen proposamen kultural hau Europa eta Amerikara zabaldu da. Izan ere, Argentinako hiri batzuetan ospatzen da 'Museoen Gaua', tartean Azul-en. Adierazpen artistikoak komunitatearengana heltzea du helburu nagusi ekitaldiak, eta asmo horrekin gauzatu zen Buenos Aires probintziako hirian joan den urriaren 1 eta 2an.

Anitz erakundek osatu zuten bi gaueko ibilbidea, hala nola, museo, eskola, kultur gune eta gizataldeen etxeek. Azulgo Gure Txokoan Euskal Herriko musika tresnen argazki erakusketa ikusi ahal izan zuten euskal etxera heldu ziren bisitariek. Horretaz gain, etxeko kideek geografia, abizenen jatorri, sukaldaritza eta kirolari buruzko datuak ere partekatu zituzten ibiltariekin.

Ekintzekin jarraituz, urriaren 26an "Que par Che" Antzerki Taldeko kideak jaso zituzten Gure Txokoa-ko arduradunek. Mariano Di Franco eta Maite Guevara aktoreek 'Barre Tailerra' eskaini zieten ehun bat laguni eta gero euskal etxeko egoitza bisitatu zuten. “Izugarri gustatu zitzaion ekintza jendeari eta eskatu ziguten berriro egiteko. Lau orduko klasea izan zen, baina azkar-azkar pasa zen, hain ondo pasatu genuen”, adierazi dio EuskalKultura.com-i euskal etxeko kide den Silvia Icetak

"Que par Che" Antzerki Taldeko Barre Tailerra 2011 01