Mendoza, Argentina. Aurten San Fermin jaiak beste era batera ospatu beharrean izango dira sanferminzaleak, bai Nafarroan, bai Diasporan. Mendozako Nafar Etxeak online ospakizuna antolatu du, San Fermin kartel lehiaketa barne. Izan ere abian ipini du Mendozako 2020ko San Fermin jaiak iragartzeko afixa hautatzeko lehiaketa, Mendozan bizi diren 18 urtetik gorakoak partaide izango dituena, sarien artean "ahoa ur bihur dezakeenen bat", adierazo digute.
Berrogeialdia dela eta, lanak ezinbestean bidali beharko dira e-postaz, centronavarromendoza@gmail.com helbidera. Epea uztailaren 3an bukatuko da. Bozketa sare sozialetan gauzatuko da: uztailaren 6 eta 7ren artean Nafar Etxeko bazkideek, lagunek eta publikoak bozkatu ahal izango dute Mendozako Nafar Etxeko Facebooken. Uztailaren 8an emaitza plazaratu eta sari banaketa uztailaren 14tik aurrera egingo da.
Lehenengo saria, urdaiazpiko bat izango da. Bigarrena, Nafar Etxeko ekimenetan urtebetez doan parte hartzeko gonbitea, eta hirugarrena, Nafarroako Entziklopedia.
Anima zaitez eta parte hartu!
Lagun bati bidali
Komentarioa gehitu
