Palma Mallorcakoa. Topaketa oso animatu batean bildu ziren 2024-2025 ikasturteari amaiera emateko Mallorcako Artea Euskal Etxeko lagunak hiriko Jai Alai euskal tabernan. Afalostean, EEko aktibitate ezberdinetako ordezkariek kanta batzuk partekatzeaz gain, ikasturtearen balantze bikaina egin zuten. “Zikloa ona izan da: jarduera arrakastatsuak izan dtu, bazkide berriak hurbildu zaizkigu, Zuzendaritza Batzordea sendotu egin da eta ekonomikoki ere ez zaigu batere gaizki joan”, adierazi diote Euskal Etxetik EuskalKultura.eus-i.
Datorren zikloari begira, jarduerez betetako egitaraua ari dira antolatzen mallorcarrak. Irailean ohiko aktibitateak hasiko dira, tartean euskara eskolak, txalaparta tailerra, txangoak, pilota eskola… eta irailaren 13an, larunbata, Diasporaren Eguna ospatuko dute Son Rapinya frontoian, Euskal Etxeko esku pilota taldearen debutarekin. Egun berean, paleta argentinar erakustaldi bat egingo dute, Maider Ardanaz munduko txapelduna eta beste pilotari argentinar bat partaide.
Beroaldi handiak ez zituen Artea Euskal Etxeko kideak izutu eta 25etik gora lagun bildu ziren Jai-Alaira
“Oporretatik bueltan, Diasporaren Eguna ospatu eta gero, txozna bat muntatuko dugu ‘Parc de la Mar’en, irailaren 19tik 21era”. “Baina ikasturtea bukatzen ari garen honetan, ezinbestekoa egiten da azpimarratzea harro gaudela gure EEaz, eta Artea talde-proiektu bat dela, euskal jarduera tradizionala den auzolanaren emaitza, eta gure bazkide eta lagunen lan besterenkoi engaiatua duela oinarri. Horregatik, ongi dago aukera hau ere baliatzea gure esker ona helarazteko honaino ekarri gaituztenei, euren lan eta ahalegina medio Artea Euskal Etxea ahalbidetzen dutenei, eskerrik asko zintzo bat!", adierazi digute.
Lagun bati bidali
Komentarioa gehitu
