euskalkultura.eus

Trenque Lauquen, Argentina. Gonbitea biharko izan arren, aspalditik daude agortuta irailaren hasieran salgai jarri ziren 450 sarrerak. Eta ez da harritzekoa; Buenos Aires probintziako Euskal Sustraiak euskal etxeak antolatutako Urdaiazpikoaren Jaia inork galdu nahi ez duen hitzordu bihurtu da azken urteotan.

Euskal erakundetik jakinarazten dutenez, “Euskal Herriko eta Argentina bertako ohiturak batzen zituen ekitaldi bat antolatzeko helburuarekin jaio zen festa. Eta ondo jan eta edatearen artea gure ohitura onenetako bat da”, dioskute. Bi zaletasun horiek asetzeko, etxeko urdaiazpikoarekin, primerako txerrikiekin, entsaladarekin eta mota askotako tartekin osatutako menua eskainiko zaie gonbidatuei.

Abiapuntua gaueko 10etarako finkatu da, Euskal Sustraiak-eko lehendakari Luis Lahitte-ren ongi etorri hitzekin. Ondoren, euskal etxeko neskek dantza emanaldi bat eskainiko dute. Proposamen gastronomikoarekin batera, ikuskizunak ere burutuko dira jaiaren programaren barruan; umorezko show-a, ‘Los Mosquitos’ bikotearen esku, eta zuzeneko musika, "Aumentando el Ritmo" taldearen ardurapean. Parranda ordu txikiak arte luzatuko da euskal etxeko kideen eskutik.

Gauerdian, eta igandean Argentinan Amaren Eguna ospatzen denez, opari bana eskuratuko zaie jaian parte hartuko duten amei. Horrez gain, zozketak ere gauzatuko dira gauean zehar. Sari nagusia, bi pertsonentzako bidaia bat.

Gero eta garrantzi handiagoa ari da hartzen jaia herri eta probintzia mailan. Izan ere, 2011an Udal Interesekoa eta aurten Probintziaren Interesekoa izendapenak lortu ditu. Izendatzearekin batera, Ibilbide Gastronomikoen agendan ere sartu da Trenque Lauquengo Urdaiazpiko Jaia. Gogora dezagun hitzordua bihar dela, gaueko 11etan, Barrio Alegre klubean, Alte. Brown kaleko 78. zenbakian.