euskalkultura.eus

Cordoba, Argentina. “Caprichoso Rejunte” izeneko murgak gonbidaturik, joan den martxoaren 5ean, Inauterien bezperan, Cordoba hiri argentinarreko Txotx! Dantza Taldeak eta Baietz Musika Taldeak bertako inauterietan hartu zuten parte.

Sarmiento Plazan, 'Gerora' Elkarteko neska-mutilek Lantz-eko pertsonaiak aurkeztu zizkioten bildutako publikoari, bertaratutakoen jakin-mina eta interesa piztuz. Nafarroatik ez oso hurbil, Miel Otxin, Zaldiko, Arotz, Ziripot eta Txatxoak Cordoban ere gailendu ziren herriko kabalkadan, txistu eta danbolinaren ahotsek lagunduta. 

['Gerora'-ko neska-mutilak Miel Otxin erretzen]

Dantza bukatu ondoren, 'Gerora'-ko kideek Miel Otxin-en figura erre zuten jendearen txaloa eraginez. “Jai ederra izan da eta komunitate osoarekin konpartitu ahal izan dugu”, azaldu diote 'Gerora'-koek EuskalKultura.com-i. “Gure gazteen sormenari eta lanari esker lortu dugu Lantz-eko inauteriak Cordobara ekartzea eta horrekin lotuta, Euskal Herriaren ezohiko irudia erakutsi ahal izan dugu. Euskaldunen eta argentinarren kulturak hurbiltzea da gure asmoa eta uste dugu bide onean gabiltzala”, adierazi dute Cordobako elkarte berri honetako arduradunek.