euskalkultura.eus

Iruñea-Pamplona. Avalle-Arceren heriotzaren berria oharkabean pasatu da, nahiz eta berez mundu mailako ospea zuen eta Kixote, Cervantes eta oro har espainiar Urrezko Mendeko literaturari dagokienean aditu gorena edo gorenetarik zen. Estatu Batuetan luzaz bizi eta lan egin ondoren, Kalifornian erretiroa hartu, eta Nafarroara bildu zen. Izan ere, 2003an UCSBko bere postua utzirik, hainbatetan iragarri zuena egin zuen eta emazte Constance Marginot-ekin, estatubatuarra bera, bere erroen lurraldera bildu zen. Iruñean, Nafarroako Ospitalean hil da, abenduaren 25ean, eritasunak larrialdi bat izan eta gainditu ahal izan ez duelarik.

Bere lanik handiena hispanista bezala izan bada ere, beti bere erro nafarretatik gertu sentitu izan den pertsona zen. Euskara eta euskal kultura hurbil sentitzen zituen eta ezagutza ere bazeukan. 1993an Santa Barbarako Kaliforniako Unibertsitateko Jose Migel Barandiaran Euskal Ikasketa Katedra sortu zenetik --Jaurlaritzak eta euskal aurrezki kutxek babestuta-- bertako titularra izan zen 2003an erretiratu arte.

EuskalKultura.com zenbaitetan mintzatu zen berarekin eta bisita ere egin zion Santa Barbarako Euskal Katedran, honako artikulua argitara emanez 2003ko apirilean omenaldia eskaini ziotenean Santa Barbaran bertan, Nevada-Renoko Unibertsitateko euskal adarreko kideak ere bertan, Europara bizitzera etorri aurretik. Berrogeita hamar bat libururen egile, zientoka artikulu ere eman ditu argitara eta Las novelas y sus narradores (eleberriak eta euren narratzaileak) liburua izan da plazaratu duen azkena, 2006an, Madrilgo Centro de Estudios Cervantinosen eskutik.