euskalkultura.eus

Makean (Lapurdin) jaio zen Juan Bautista Istilart eta 10 urterekin heldu zen Argentinara. Doloresen lekutu zen hasieran, Buenos Aires probintzian, baina 20 urte zituela Tres Arroyosera joan zen eta herri honetan bizi izan zen 1934an hil zen arte. Bertan puntako industria baten oinarriak jarri zituen, Istilart lantegia sortuz. Lantegi honek nazioarteko arrakasta handia izan zuen bere gidaritzapean eta XX. mendean ibilbide bikaina izan zuen, krisi batzuk gainditu eta gero. Gaur egun Argentina mailan ezaguna izaten dirau.

Istilart lantegia Tres Arroyoseko komunikabideetan da egunotan ere, udaleko araubide batek jatorrizko lantegia egon zeneko lur sailak urbanizatzeko baimena eman duelako. Proiektua 2006ean aurkeztu zuen inbertitzaile pribatu talde batek, baina bideratzeko arazoak izan dira orain arte. Azkenean, udalaren baimena heldu da eta etxeak egin ahal izango dituzte trenbideak eta Sarmiento, Sebastián Costa eta Brandsen kaleek mugatzen duten sailean. Proiektuaren aurkako ahotsek leku honek Tres Arroyoseko historia industrialean duen garrantzia azpimarratu dute.

Lotura interesgarriak

Istilart fabrika zaharra bota eta urbanizatu behar dute
www.lavozdelpueblo.com.ar

Enpresaren webgunea
www.istilart.com.ar

JB Istilart-i buruzko soslaia
www.elperiodista3a.com.ar

Ospe handiko tresarroyostarra
www.elperiodista3a.com.ar

Istilart lantegiaren historia laburra
www.istilart.com.ar