Josu Legarretak hitzaldia eskainiko du gaur goizean Tandileko Gure Etxea elkarte euskal-argentinarrean

2011/11/11

Josu Legarreta Bilbao

PUBLIZITATEA

Tandileko Euskal Etxearen 'Alma Vasca' berri buletinak jakinarazi duenez, gaur goizean Gure Etxean izango da Josu Legarreta Bilbao, 1986tik 2009ra Eusko Jaurlaritzaren Euskal Gizataldeen Zuzendari izan zena. Legarreta Argentinan da egunotan eta Tandileko Euskal Etxera bisita egingo du gaur, aspaldiko lagunak agurtzeko eta hitzaldi bat emateko. Gure Etxeak datozen egunetan egingo dituen beste ekitaldi batzuk Marita Echaveren “Cocina Campesina Vasca” liburuaren aurkezpena eta Gure Abestiak koruak antolatu duen Abesbatz Topaketa izango dira.

Tandil, Argentina. Tandileko Gure Etxea-ko 'Alma Vasca' buletinak elkarteak datozen egunetan egingo dituen ekimenen berri dakar:

-gaur bertan, 11:30tan, hitzaldia eskainiko du elkartean Josu Legarretak. 1986tik 2009ra Eusko Jaurlaritzaren Euskal Gizataldeen Zuzendari izan zen Legarreta eta elkarteko lagunak agurtzeko probestuko du bisita hau.

-gaur ere abiatuko dira Necochearuntz Argentinako Euskal Astean parte hartuko duten Tandileko dantzariak, Gure Abestiak koruko kantariak, zuzendaritza batzordeko ordezkariak eta zenbait bazkide.

-datorren asteartean, azaroaren 15ean, Corina Yannarella doktoreak berpizte kardiopulmonarrari buruzko hitzaldia emango du, 19:00tan.

-azaroaren 16ean Maria Echavek, Coronel Moldeseko Gure Zainak Euskal Etxeko presidenteak, "Cocina Campesina Vasca” liburua aurkeztuko du. Ez hori bakarrik, zuzenean prestatuko baitutu zenbait euskal plater. Hitzaldiaren eta sukaldaritza tailerraren ondoren, bertara biltzen direnek jakiak dastatzeko aukera izango dute. 19:30tan hasiko da ekitaldia eta bertara joan nahi duenari Janari Bankuari dohaintzan emateko janaria eramatea eskatzen diote antolatzaileek.

-azaroaren 18an Mus Txapelketa egingo da. 'Pablo Barberena' izena du txapelketak, berriki zendu zen bazkide honen omenez. Sarmiento 1079-ko egoitzan, 20:30tan.

-azaroaren 19an Abesbatz Topaketa antolatu du Gure Abestiak koruak. 19:00tan hasiko da eta ondoren lagunarteko afaria egingo dute kantariek.