euskalkultura.eus

Santa Monica, AEB. Iñaki Castañeda eta Alfredo Olabegoia kirolariak Santa Monican dira dagoeneko eta bertatik abiatuko dira bihar AEBetan barrena biziko duten abenturaz gozatzeko. Bidaiaren jomuga New York hiria izango da eta horretarako ekaina bitartean AEBetako hainbat estatu igaroko dituzte, "Route 66" errepide mitikoa jarraituz. Castañedak handbike edo esku-bizikletan egingo du bidaia, eta lehen aldiz, horrelako balentria laguntza autorik gabe egiten saiatuko da taldea.

Bidaiak duen kirol erronkaz gain, elkartasunezko osagaia ere badu; izan ere, kirolariek gaisotasun arraroen ikerkuntzarako dirua biltzeko baliatuko dute proiektua, EuskalKultura.com-i azaldu diotenez.

Goi mailako kirolariak 

Iñaki Castañeda marka asko dituen goi mailako kirolaria da. Esaterako Ironman bat (triatloirik gogorrena) amaitu zuen aurreneko euskal kirolari minusbaliaduna izan zen (Karnten, Austria, 2009) eta Ironman egokituan espainiar estatuko markarik onena du (11:07:14). Horrez gain, Europako distantzia luzeko Paratriatloi txapelduna da (Gasteiz, 2010).

[Iñaki Castañeda handbikean lehian (argazkia ICastañeda)]

Alfredo Olabegoiak, bidaia honetan laguntzaile, kazetari eta itzultzaile lanak egingo ditu, eta bizikleta hibridoan bi kirolarien ekipajea eramango du. Olabegoia ere goi mailako kirolaria da: Hawaiiko Ironmana amaitu zuen estatu espainiarreko aurreneko kirolaria izan zen (1988) eta guztira 18 Ironman amaitu ditu.

Kostatik kostara

Bidaia bihar hasi eta ekainera arte luzatuko da. Los Angelesetik New Yorkera bidea egingo dute bi kirolariek, Kalifornia, Arizona, New Mexico, Texas, Oklahoma, Kansas, Montana, Illinois... eta beste zenbait estatu zeharkatuz.

[Bi txirrindulariek AEBetan barrena egingo duten bidea]

Castañedak eta Olabegoiak bidean euskal komunitateko kideak ezagutzeko gogoa agertu dute, eta beraiekin bildu edo bidean tarte batean lagundu nahi dietenei eurekin harremanetan jartzeko gonbitea luzatu diete. Horretarako, idatzi e-maila hona, edo eurekin harremanetan jarri Euskadi_Ruta 66" Facebook orriaren bitartez. Orri horretan abenturaren eguneko berriak eta argazkiak argitaratuko dituzte. Animatu. Eta eurei, zorte on eta aurrera!