euskalkultura.eus

Chacabuco, Argentina. Ia berrehun lagun bildu ziren joan den larunbatean, azaroaren 12, Chacabucoko Guillermo Larregui Euskal Etxeak antolatutako Tabernan. Gaueko bederatzietan hasi eta goizaldeko hirurak arte luzatu zen jaia. Dantza eta musika ikuskizun ugari eta euskal zein argentinar plater tipikoen menu bariatua eskaini zuten. Hitzorduak agerian utzi zuen beste behin euskal elkarteak egiten duen lan ederra bidea emanez gaztetxoei eta hain gazte ez direnei ilusiotik eta ekipoko lana lokarri elkarrekin jarduteko eta kultura eta erakunde proiektuak aurrera ateratzeko, euskal kulturaren eta chacabucotar eta argentinar jende eta kulturaren mesedetan.

Dantza emanaldiaren tenorean, Guillermo Larregui-ko 'Alaia' dantza taldeak, Verónica Guarnaloussek zuzendari, Kaskarot, Arku dantza eta Arin arin aurkeztu zituen. Umeek ere euren urte osoko lanaren emaitza erakutsi zuten, Orpo punta dantzatuz. Beren aldetik, Chacabucoko Griselda Morraren dantza klasiko ikasleek euren abilezia eskaini zieten bertaratutakoei. Eta ikuskizuna bukatzeko, Nacho Cieri artista lokalaren kontzertuaren unea iritsi zen, herri kanta melodikoak abestu eta bildutako guztiak dantzan jarriz.

Dantza, gastronomia eta talde-lana

Eskaintza gastronomikoak aipamen berezia merezi du eskainitako aukera ugariagatik. Batetik  hemen ohikoenak diren jakiak prestatu zituzten, esan nahi baita enpanadak, txoripanak, hanburgesak eta pikadak, eta baita pixka bat landuagoak ere, hala nola 'txorizoak pomarolan', pintxo bariatuak eta Euskal Etxeko espezialitatea diren 'tripakiak Bizkaiko erara'. Postre gisa ere aukera polita: izozkiak, goxua, arrozesnea, gabonetako konpota, udareak Borgoina, flana eta natilla. Hitz eman zuten bezala, gau bikaina izan zen, bertaratutako batek gure buletinari esan dionez.

Ekitaldiari buruzko bere iritzia galdetuta, Guillermo Larregui Euskal Etxeko lehendakari Lucia Igarzabalek hauxe esan digu: “Gehien nabarmendu nahi nukeena gure ekipoa da, daukagun jende talde bikaina, euren gogoa, lanerako jarrera eta lagunarteko giro ederra. Hori nahi dut azpimarratu eta, jakina, eskerrak eman beti lagun eta sostengu dugun Chacabucoko komunitateari", adierazi dio EuskalKultura.eus-i.