euskalkultura.eus

euskal diaspora eta kultura

Albisteak rss

Hiru Erreka Euskal Etxeak indarra hartu du Tres Arroyosen eta baita eskualdeko herrietan ere

2008/09/04

Hiru Errekako lehendakari Jose Luis Artuch eta Mariana Erneta (argazkilaria agurtzen) Gizataldeen Azokan (argazkiak Hiru Erreka)
Hiru Errekako lehendakari Jose Luis Artuch eta Mariana Erneta (argazkilaria agurtzen) Gizataldeen Azokan (argazkiak Hiru Erreka)

PUBLIZITATEA

Buenos Airesetik bostehun bat kilometro hegoaldera dagoen herri honetan urtero antolatzen den Gizataldeen Azokan partaide garrantzitsuenetako bat izan da aurten ere Hiru Erreka Euskal Etxea. Abuztuaren 10ean burutu zen jaia, eta elkartearen standean Euskal Herriko sukaldaritzak aparteko lekua hartu zuen. Gastronomiarekin batera, abizenei buruzko informazioa eskuratu eta euskararen inguruko hainbat jardueratan parte hartu ahal izan zuten gonbidatuek. Euskal Etxeko dantzariek dantzak eta jantzi berriak estreinatu zituzten, eta euskara klaseei dagokienez, albiste bikainak dituzte dituzte Hiru Errekakoek: aurten A. G. Chaves herriraino heldu dira klaseekin.

Tres Arroyos, Argentina. Immigranteek sortutako Argentina hegoaldeko herrietan Gizataldeen Azokak jai jendetsu eta oso herrikoiak izaten dira. Kolektibitate guztietako elkarteek ahalegin eskerga egiten dute ospakizun horri begira eta jaialdiak lan polita egiten du oraingo eta iraganeko belaunaldien arteko zubilana egiten.

Buenos Aires probintziako Tres Arroyos hirian ere sona handia du jaialdiak eta pasa den abuztuaren 10ean, igandez, egin zuten bertakoek Gizataldeen Azoka, 'El Fanal' izeneko esparruan. Euskal Etxeak prestatutako standak eskaintza gastronomikoa (txistorra, odolkia eta postreak) eskuragarri edukitzeaz gain, hizkuntzarekin lotutako proposamenak ere prestatu zituen bertara jakinminez gerturatu zirenentzat. Besteak beste, aukera emanez publikoari bere abizenen jatorriari eta, kasu batzuetan, esanahiari buruzko informazioa lortzeko eta, jolasak medio, baita euskarazko hitz batzuk ezagutzeko ere.

Hiru Erreka Kolektibitateak 2008 2
[Hiru Errekako standean antolatu zituzten jokoetan euskara maila erakutsi zuen bisitarietako bat]

Herriko mugetatik landa

“Nahiz eta oro har aurten aurreko urteetan baino jende gutxiagok hartu zuen parte jaialdian, gure standak bisita dexente jaso zituen. Guk egin genuen balantzea oso baikorra da eta denbora pasatu ahala Tres Arroyoseko gizartean lortzen joan garen presentzia eta eragin hazkorra neurtzen lagundu digu”, azpimarratzen du Hiru Errekako lehendakari José Luis Artuch-ek.

Azken urteotan Hiru Errekaren indarrak hiriaren mugak gainditu ditu. Euskalkultura.com-ek jadanik islatua duenez, joiaz bertan Euskal Etxeko euskara irakaslea, Andres Monteagudo, ondoko Claromeco herrian hasia da euskara eskolak ematen. Aurten, irakaskuntza lan  hori zabaltzeko asmoarekin, A. G. Chaves herrira ere heldu dira klaseak eta talde berri honetan dagoeneko hamabost bat lagun ari dira ikasten.

Hiru Erreka Kolektibitateak 2008 3

[Hiru Errekako dantzariek erakustaldia eskaini zuten Gizataldeen Azokan]


Lotura interesgarriak

Hiru Erreka Euskal Etxearen webgunea
www.hiruerreka.com.ar



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia