euskalkultura.eus

Montevideo, Uruguay. Montevideoko Haize Hegoa Euskal Etxeak ez zuen urteroko hitzorduan huts egin eta neska-mutil asko bildu zituen Euskal Usadioen Lehiaketaren XI. edizioan.  'Eskoletako umeei euskal usadioak erakusteko bide orijinal bat da', azaldu zion EuskalKultura.com-i Haize Hegoako lehendakari Enrique Poittevinek. 'Ideiai gazteei euskal usadio eta  kondairak kontatzea da, ondoren beraiek aurrez prestaturiko postaletan gai honi buruzko marrazkiak egin ditzaten. Txartel horiek  urtero bezala, Haize Hegoaren Gabonetako postalak izango dira eta munduko Eusakl Etxe,  erakunde eta kolaboratzaileei bidaliko dizkiegu'. 

Gaztetxoen erantzuna oso ona izan zen eta askok parte hartu nahi izan zuten lehiaketan. Marrazkilariek margo eta beste materialak izan zituzten eskuragarri, bakoitzak bere gustokoa aukera zezan. Adi-adi entzun zituzten Maite Bengoak azaldu zizkien usadio eta kondairak, eta horren ostean, marrazteari ekin zioten.

 [Neska-mutilak Maite Bengoaren ipuinak eta kondairak entzuten (argazkia Haize Hegoa EE)]

Bakoitzak bere marrazkia bukatu eta aurkeztu ostean, irabazlea nor izango ote zen ezagutzeko irrikan itxaron zuten. Denak izan ziren  irabazle, Haize Hegoak denentzako opariak prestatu zituelako, baina arlo bakoitzean sari berezia izan zuten lau partaide izan ziren ere.

 [Gazteak askaria jaten, irabazlea nor izango ote zen jakiteko zain (argazkia Haize Hegoa EE)]

Haize Hegoako arduradunak ekitaldiarekin oso pozik agertu dira, Euskal Etxearen klasikoetako bat bihurtu dela onartuz. 'Beste urte batez, marrazki orijinal hauek munduko bazterretara helduko dira, umeek bakarrik zabaldu dezaketen bake mezuarekin', bukatu zuen Enrique Poittevin-ek.

 

 [Partaide nagusietako batzuk euren lanak erakusten (argazkia Haize Hegoa)]

  [Lehen postua irabazi zuen neskatila saria jasotzen (argazkia Haize HegoaEE)]