euskalkultura.eus

Necochea, Argentina. Bidaia honen aurrekaria 2008an Gazte Alaiko beste 28 gaztek egin zutena izan zen. Orduan, euskal eta argentinar dantza ikuskizuna eskaini zuten Euskal Herriko hainbat herritan: Azpeitia, Oiartzun, Villabona, Lemoa, Hernani, Zeanuri, Legutio eta Etxarri-Aranatz. Oraingoan, dantzari belaunaldi berri batek izango du arbasoen lurraldean dantza egiteko aukera.

Aurtengo bidaiari dagokionez, badira dagoeneko zenbait emanaldi antolatuta: Bankan (Nafarroa Beherea) uztailaren 13an, Irurtzunen (Nafarroa) 17an, Tolosan (Gipuzkoa) 20an, Donostian 21ean (Gros auzoko jaietan), Bergaran (Gipuzkoa) 25ean, Pasaian (Gipuzkoa) 28an eta Lemoan (Bizkaia) 31n. Horiez gain, Gorlizen emanaldi bat ere egingo dute ziurrenik. Emanaldi horietako gehienak herri hauetako taldeekin lankidetzan egingo dituzte.

Bi urte bidaia prestatzen

Gazte Alai taldeko iturriek aditzera eman dutenez, bidaia honen antolakuntza "bi urteko lanaren emaitza izan da, izan diren erazgozpen guztiak gaindituz. Puntu honetara heldu gara gure sendien laguntzari esker, euskal etxeari esker eta gure komunitate osoari esker. Lagun askok eta oraindik ezagutzen ez ditugun kolaboratzaile askok ere sostengua eman digute, eta azken hilabeteotan gurekin lanean aritu dira buru-belarri Euskal Herritik, amets hau betetzen laguntzeko".

Era berean, taldeak lankidetza eskertu dio "La Platako Euskal Etxeari, izan ere, gutako askok hiri horretan ikasten dugu eta elkarteak dantza entseguak egiteko leku bat utzi zigun".

Amaitzeko, Gazte Alaik Necocheara biltzeko gonbidapena luzatu die bere ekimenetan parte hartu nahi dutenei, eta horretarako hurrengo hitzorduen berri eman du: dantza erakustaldia ekainaren 20an, San Juan eguneko erromerian, eta ondoren Sorginaren Erretzea.