euskalkultura.eus

Arvada, Colorado, AEB. Coloradoko Euskal Etxea oso elkarte gaztea da --2003an sortu zen-- baina urte hauetan kideen arteko sare estu bat sortzea lortu du, euskara ikastaroen eta beste ekimen batzuen bidez. 'Gure klubak elkarrekiko oso desberdinak diren kideak ditu', azaltzen dio Mary Ann Matassak EuskalKultura.com-i. 'Garai latzak izan ditugu, hemen ez genuelako urte askotako tradizioa zuen euskal komunitate finkorik, baina orain ari gara harreman horiek sortzen'. Matassak azaltzen duenez elkarteko kideen artean denetarik dago, Euskal Herritik immigratu duten gazteak zein Juan de Oñate historikoarekin etorri ziren euskaldunen ondorengoak.

Elkartearen ekimen garrantzitsuenetako bat euskara klaseak dira, Ibon Izurieta bilbotarraren gidaritzapean. Euskal kultura elkarteko kideen artean eta Coloradoko biztanleen artean ezagutzera ematea du helburu elkarteak eta asmo horrekin aurten lehen aldiz jai berezi bat ospatzea erabaki dute. Halloween eta euskal kultura? Harremanik ba ote? Ba bai, euskal etxeak Estatu Batuetan hain ezaguna den jai hau euskal erara ospatzea erabaki baitu: Akelarre bat egingo dute eta kideei euskal pertsonaia mitologikoz mozorrotzeko eskatu diete. Mozorroaren bila ikertu bitartean, euskal mitologiari buruz ikasiko dute, beraz.

Elkarteak egin zuen azken ekitaldietako bat  V. Mendiko Jaia izan zen, abuztuaren 23an. Jaia Denver hirian egin zuten, Rocky Mountains-en (Mendi Harritsuen) magalean, hortik izena. Elkarteko kide asko bildu ziren piknik honetara, antolatzaileek prestatu zuten barbakoa eta jardueretaz gozatzeko prest. Jarraian ekitaldiko argazki batzuk eskaintzen ditugu:

[Elkarteko kide gazteenak Mendiko Jaian, euskal etxeak etorkizun oparoa duela erakutsiz (argazkiak Colorado EE)]

[Mendiko Jaiara bildu zen familia bat]

 [Barbakoan eginiko kutixiak dastatzen]


[Jaian elkartearen alde lan egiteko astia topa zuten asko izan ziren]


[Etxeko txikienak ere bildu ziren Mendiko Jaira]

Colorado Euskal Etxeari buruzko informazio gehiago hemen.