Gaztezulo.com webgune berriak erreferentzia erabilgarria izan nahi du munduko gazte euskaldunetzat

Euskal Herriko gazteen nahiak, kezkak, joerak eta bizimodua ezagutu nahi dituenak badu leiho zabal eta gardena Gaztezulo.com-en. Duela zazpi urte Donostia aldeko Irutxulo aldizkariko gehigarri gisa sortu zenak erronka berriak lantzeari ekin dio. Apirilaz geroztik garai berri bati hasiera eman zioten paperezko aldizkaria berritu eta web gune oso bat kaleratuz. Paperezko aldizkariari dagokionez, 6.500 harpidedun dauzkate eta hilabetero orotara 10.500 bat ale inguru banatzen dituzte. Orain, webgunea jadanik plazan, Euskal Herri geografikoko gazteengana ez ezik, mundu osoko gazte euskaldunengana iritsi nahi dute Gaztezulokoek. Horregatik euren mezua: 'bisita ezazu gure webgunea'.

Ausartki heldu diote Gaztezulokoek euren bigarren garaiari, baina itxura edukirik gabe ezer gutxi denez, sailak birmoldatu eta beste hamaika atal berri gehitu dizkiote webguneari. Sei laguneko taldea dira erredakzioan, eta kolaboratzaileak, aldiz, ugari, gazteen kezken isla izateko sortutako aldizkariak ezinbestekoa baitu irakurle dauzkan gazteekiko etengabeko komunikazio eta feed-backa. Bestetik, lan mardula burutu dute azken zazpi urteetako aldizkari guztiak digitalizatu eta eskuragai ipintzen. Hortaz, une honetan, aldizkariak bere ibilbidean argitaratu dituen elkarrizketa eta erreportaia guztiak webean ere irakur daitezke.

Webguneko protagonistak irakurleak direla azpimarratu digute Gaztezuloko kazetariok, izan ere, garrantzi handia eman baitiote interaktibitateari eta praktikotasunari, irakurleekiko komunikazioari. Esate baterako, sexu eta informatikari buruzko kontsultak online egin ditzake webgunera sartzen den irakurleak; pisua alokairuan hartu edo jarri nahi duenarentzat ere helbide baliagarria gerta daiteke Gaztezulo; lagunekin komunikatu eta hitzorduak jartzeko aukera ere badago eta harpidedun izanez gero, mezuak uzten ahal dira eta Euskal Herriko agenda kulturalaren azken berriak ere topa daitezke. Eta kasu! hemendik aurrera ordagoak eta enbidoak lasai botako dituzte unibertsitateko kafetegiko mus partidak maite dituztenek, bi klik eginda apunteak jaitsiko dituztelako barren-kezkarik gabe, Gaztezuloko webetik, bertatik esaten zaigunez.

Donostiatik mundura

Gaztezulo mundura zabaltzeko bokazioz sortutako gunea denez gero,Euskal Herri geografikotik kanpoko euskaldunei xagua luzatu nahi diete parte aktiboa har dezaten: agendan euren herrietan antolatzen dituzten ekitaldien berri emanez, argazkiak zintzilikatuz edo proposamenak luzatuz. 'Gauden tokian gaudela, euskaldun gazteentzat erreferentzia birtual mamitsua da Gaztezulo.com'.

Lotura interesgarriak

Gaztezulo web orria
www.Gaztezulo.com

Publicado en EuskalKultura.com el 2 de abril de 2007

euskalkultura.eus

Albisteak

Gaztezulo.com webgune berriak erreferentzia erabilgarria izan nahi du munduko gazte euskaldunetzat

Irakurrienak

Azken komentarioak