euskalkultura.eus

euskal diaspora eta kultura

Albisteak rss

Eusko Jaurlaritza eta Kolonbia elkarlanean arituko dira herri latinamerikarreko hizkuntza indigenak sustatzeko

2008/04/22

Jaurlaritzako egoitzan egindako prentsauerrekoan, erdian, Paula Marcela Moreno eta Miren Azkarate
Jaurlaritzako egoitzan egindako prentsauerrekoan, erdian, Paula Marcela Moreno eta Miren Azkarate

PUBLIZITATEA

Kolonbiako Kultura ministroa, Paula Marcela Moreno, Euskal Herrian izan da egunotan eta Eusko Jaurlaritzarekin lankidetza akordioa sinatu du bere herriko hizkuntza indigenen garapen eta sustapena bultzatu asmoz. Kolonbian kreolera, romanesera eta hainbat etnia indigenen hizkuntzak ofizialak dira, bakoitza bere eremuan, eta bertako gobernuak Eusko Jaurlaritzak euskararekin egindako lana eredu hartu nahi du sustapen prozesu honi ekiteko.
Eusko Jaurlaritzaren Kultura sailburua Miren Azkaratek eta Kolonbiako Kultura ministroak, Paula Marcela Morenok, bi gobernuen arteko elkarlan protokoloa izenpetu zuten joan den ostiralean. Akordio honen bidez hizkuntza politikaren alorrean informazio eta esperientzia trukea egingo dute bi gobernuek eta Hizkuntza Politikarako Sailburuordetzak (HSP) aholkularitza teknikoa eskainiko dio Kolonbiako Kultura Ministerioari hango hizkuntza indigenak, kreolera eta romanesa berreskuratzeko.

Kolonbiar agintariek interes handia agertu dute euskarak azken hiru hamarkadetan Euskadin izan duen bilakaeraren inguruan. Kolonbian 60 bat hizkuntza daude guztira eta Konstituzio Politikoak dioenez 'gaztelania Kolonbiako hizkuntza ofiziala da', baina 'talde etnikoen hizkuntzak eta dialektoak ere ofizialak dira bakoitza bere lurraldean'. Lege babesa badute, beraz, Kolonbiako hizkuntza indigenek, baina haiek bermatzen hasteko, Gobernuak hizkuntzak biziberritzen hasteko, ez dute soziolinguistika alorreko ezagutzarik. Hutsune hori betetzen laguntzera dator Lankidetza Akordio hau.

Lau urterako lankidetza

Datozen lau urteotan modu formalean eskainiko dio HPSk aholkularitza zientifikoa eta teknikoa Kolonbiako Kultura Ministerioari eta bertako talde etnikoekin batera formulatuko du hizkuntza politika. Bi lan ildo nagusi izango dira: hizkuntza indigenen, kreoleraren eta romanesaren ikerketa, batetik, eta hizkuntza horien guztien sustapena eta zabalkundea.

HPSk eta Kolonbiako Kultura Ministerioak arreta berezia eskainiko diote hizkuntzen transmisioari, irakaskuntza-ikaskuntzan erabiltzeko baliabideen diseinuari, eta atal berezi bat eskainiko diote, baita ere, informazioaren eta komunikazioaren teknologien ezarpenari. Beste hainbat ekimenen artean hizkuntza indigenen, kreoleraren eta romanesaren egoera soziolinguistikoaren diagnosia egingo dute. Lankidetza gauzatzen hasteko, HPSko ordezkaritza bat aste gutxi barru, maiatzean bertan joango da Kolonbiara mintegi bat eskaintzera hizkuntzaren egoeraren inguruko diagnostikoak egiteko tresnak eta metodologia azaltzera.


Lotura interesgarriak

Eusko Jaurlaritzako Kultura Saila
www.euskadi.net

Patxi Baztarrika sailburuordea Kolonbian
EuskalKultura.com-en argitaratua 2007ko uztailaren 24ean


« aurrekoa
hurrengoa »

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia