euskalkultura.eus

Buenos Aires, Argentina. Poteatzeko ohitura egunerokoa da euskal herrietan; Euskal Herritik kanpo, ordea, bitxia egiten da. Poteatzea tabernaz taberna ibili eta bakoitzean pote bat hartzean datza. Triki-poteoan, orduan, leku batetik bestera egiten den ibilbidean zuzeneko musikaren erritmora joaten da.

Datorren asteburuko ekintza Euskaltzaleak-ek antolatuko du eta Euskaltzaleak-etik bertatik aterako da Triki-poteoa honako ibilbidea osatzeko: Bernardo de Irigoyenetik Estados Unidos kalera, Estados Unidosetik Defensara eta Defensa kaletik Defensa Plazara, San Telmo auzo sakonean murgilduz. Ibilbide osoan eta Defensa Plazaren inguruan, pote batzuk hartzeaz gain, abestu eta dantza egingo dute euskaltegiko lagunek trikitixa, alboka eta panderoek lagunduta.

“Triki-poteoa egingo dugun lehenengo aldia izango da eta irrikan gaude. Jende asko animatuko da, kideak ez ezik, beste erakunde batzuetako lagunak ere aterako dira gurekin, hala nola, gizatalde eskoziarrekoak. Are gehiago, musikari eskoziarrak euskal abesti bat prestatzen ari dira denon artean kantatzeko. Beste alde batetik, ibilbideko tabernetako arduradun batzuekin hitz egin dugu jadanik, nortzuk garen azaltzeko eta jakinaren gainean egon daitezen”, adierazi diote EuskalKultura.com-i Euskaltzaleak-eko kideek.

Behin Triki-poteoa bukatuta, euskal etxeko egoitzan bilduko da berriro koadrila afaria partekatu eta parrandarekin jarraitzeko. Gonbitearekin batera, Buenos Aireseko euskaltegitik jakinarazi digute 2013 honetan, eta beti bezala, Euskararen Eguneko Festarekin itxiko dutela ikasturtea. Jaia abenduaren 7an izango da, gaueko 9:30etan, Kataluniako etxeko areto nagusian, Chacabuco kaleko 863an.