euskalkultura.eus

Buenos Aires, Argentina. Euskal Herriaren berri emateko aukera paregabea izan du hiriburuko euskal gizataldeak irailaren 28 eta 29an burututako Kolektibitateen Jaian. Bi egunetan zehar, eta eguraldi kaskarrari aurre eginez, Pirinioetako bi aldeetako kultur adierazpen anitz egon dira standean ikusgai. Eta publiko ugari hurbildu da txokora, informazio eske eta mokadu bat dastatzera. Retiro auzoan dagoen Immigranteen Hoteleko agertoki nagusian euskal dantzak ere luzitu ziren, oraingo honetan, Lizarraenea euskal etxearen ordezkari den Ekin Dantzari Taldearen eskutik.

[Ikurriñak lehen aldiz izan du aurten lekua ikurriñak Buenos Aireseko Immigranteen Hoteleko sarreran (argazkia EuskalKultura.com)]

[Eta ikurrinek ere markatu zuten bidea standeraino. Euskaltzaleak euskaltegia eta Iparraldeko Euskal Etxea arduratu ziren txokoari euskal giroa emateaz (argazkia EuskalKultura.com)]

[Jakin-minak bultzatuta, jende asko sartu zen standera. Standaren arduradunek historia, geografia, genealogia, arkitektura eta beste hamaika gairi buruzko informazioa eman zieten bisitariei (argazkia EuskalKultura.com)]

[Eguerdi aldera, lanpetuenak sukaldariak izan ziren. Pintxoez gain, taloak izan ziren proposamen berria. Postrerako, berriz, Expo Cañuelasen 2. saria lortu zuen El Mundo lantegi euskal argentinarraren ‘dulce de leche’ eskaini zen standean (argazkia EuskalKultura.com)]

[Iparraldeko herrixketako eraikuntzen maketak, baserri txiki mutagarriak, euskara posterrak, eskuz egindako oroigarriak… eta jendea bere jatorriari buruz galdetzera bertaratuta. Standa bisitatu zutenen artean, Frente para la Victoria alderdiko diputatu hautagaia den Juan Cabandie-ren presentzia aipa daiteke (argazkia EuskalKultura.com)]

[Berrogeita bost dantza eta musika talde pasatu ziren jaialdiko tauletatik. Euskal Herriko koreografiak Aitor Alavak zuzentzen duen Ekin Dantzari Taldearen eskutik iritsi ziren Immigrantearen Hoteleko Festara. Hasteko, kalejira bat dantzatu zuten dantzariek publikoaren artean; ondoren, ‘Arratiako Jota’ eskaini zioten bildutako jendeari (argazkia EuskalKultura.com)]

[Musika eta dantzak ez ziren agertokira mugatu. Standaren inguruan Euskaltzaleak eta Iparraldeko Euskal Etxeko musikari eta dantzariak aritu ziren. Urtero bezala, gainera, Eskoziako ordezkariek euskal standa bisitatu zuten abesti tradizional bat oparitze aldera (argazkia EuskalKultura.com)]

[Bisita bueltatzeko eta trikitixa eta panderoen erritmora, euskal etxeetako lagunak Eskoziako gunera  abiatu ziren. Bertan bi herrietako musika tresnak nahastu  ziren Euskal herriko kanta tradizional bat egiteko (bideoa EuskalKultura.com)]

[Igandeko desfilean, Iparraldeko Euskal Etxeko Rosa Misciagnak eta Emilio de Candidok izan zuten ikurrina eramateko ardura. Festa arratsaldeko 7ak aldera bukatu zen, datorren urtean errepikatuko dela agindu eta gero (argazkiaEuskalKultura.com)]