euskalkultura.eus

Albisteak

Euskara ikasleen komeriak sarean ikusgai, Bartzelonako Euskal Etxeak bere blogean jarri dituen laburmetraietan

2007/06/11

Gaur bukatuko da Bartzelonan Euskal Etxeak antolatzen duen Zinemaldia'07, 'Nomadak TX' dokumentalaren emanaldiarekin hain zuzen. Bartzelonaraino inguratu ezin dutenentzat, ordea, Euskal Etxeak oparia utzi du bere blogean: elkarteko euskara ikasleek egin dituzten laburmetraiak sareratu ditu. Sei bideo dira guztira, gai eta estilo desberdinekin, baina beti ere mundu osoko euskara ikasleek ederki ulertuko dituzten egoerak jorratuz.

Bartzelonako Euskal Etxeak gaur gauean itxiko ditu euskal zinema Kataluniako hiriburura hurbiltzeko asmoz antolatu duen Zinemaldia'07aren ateak. Euskal aktore eta zuzendari zerrenda pasa da egunotan euskal etxetik, baina zinemaldiak bestelako izarrak ere izan ditu: elkarteko euskara ikasleak. Zenbait taldetan bilduta, ikasleok laburmetraia batzuk egin zituzten eta joan den maiatzaren 31ean erakutsi dituzte Euskal Etxeaaren egoitzan. Teknika eta medio aldetik xumeak dira lanak, baina bikainak ikasleek erakutsi duten gogo eta umorearen aldetik, eta publikoak ederto hartu zituen.

Orain, mundu osoko internet erabiltzaileek ere ikusteko moduan ipini dituzte, Euskal Etxearen blogean. Sei bideo dira guztira, euskaraz egindakoak. Bertan ikasleek, umorez eta ironiaz, klasean egunero bizi dituzten egoerak erakusten dituzte. Euren arteko irabazlea 'Murgildu zaitez' lana izan zen, 2A mailako ikasleek egina. Beste lanak honokoak dira: 'Nor-Nori-Nork zoratzen nau' (sic) [2b mailako taldeak egina], 'Bartzelonan galduta' [1b mailakoak], 'Barraskilo lasterketa' [1a maila], 'Munduko euskararen erabilera' [EGA taldea] eta 'Euskal taoismoa' [Mintzapraktika]. Bideook hemen ikus daitezke.


Lotura interesgarriak

Bartzelonako Euskal Etxearen bloga
blog.euskaletxeak.org

Zinemaldia'07ri buruzko artikulua
BasqueHeritage.com-en 2007ko maiatzaren 25ean argitara emana

---

---

Irakurrienak

• 2024/04/12
  Pintxo Gaua Chivilcoyn Amalur sukaldaritza taldearen eskutik, baita euskara eta helduentzako dantza eskolak ere
• 2024/04/10
  FEVAk Batzar Orokorra egingo du Asier Iriberri zerrenda bakarreko buru dela eta Arantxa Anitua lehendakariorde
• 2024/04/11
  Bilera batera deitu dute Boisen Euskal Etxean, musikari bila Euskal Herriko moduko txaranga bat sortzearren
• 2024/04/11
  Batzordea berrituta, Cañuelaseko Denak Batek larunbatean ospatuko du Aberri Eguneko Koru eta Dantzarien Topaketa
• 2024/04/16
  BEOren 2024 euskal bekak AEBn: "Janariaren eragina euskal kulturan" gaiari lotutako obrak beharko dira aurkeztu

Azken komentarioak