euskalkultura.eus

Boise, AEB. Gina Gridley-k antolatu du tailerra Mountain Home-ko Euskal Lagunak taldearen baitan. EuskalKultura.com-en galderei erantzunez, ikastaroa euskal klubeko bazkideek hala eskaturik gauzatu dela dio. Duela bi urte, elkarteko Zuzendaritza berriak berrantolaketa bati ekin zion eta bazkideei zein aktibitate berri antolatzea gustatuko litzaieken galdetuta, musean jokatzeko aukera izatea izan zen erantzunetako bat. Ginak, geroztik, Boiseko Euzkaldunak-ek Idahoko hiriburuan antolatutako mus ikastaro batean hartu zuen parte eta hor konturatu zen horrelako zela Euskal Lagunak-ek behar zuena. 

Lehenengo pauso honekin, epe motzera, interesa duten bazkideak musean jokatzen jarri nahi ditu Euskal Lagunak-ek. Jakinik praktika oinarrizkoa dela eta jardunarekin euren jokoa hobetu eta ekimenak goranzko bidea har dezakeela, aukera hori eman nahi die bazkideei, oinarriaren ondotik eurak euren bidea egin dezaten. Bigarren pauso bat, Euskal Etxearen barruko lehenengo Mus txapelketa antolatzea izango litzateke, bertan irabazten dutenak NABO Mus Txapelketara klubeko ordezkari bidaltzeko.

Gaurko ikastaroa, eta bere baitan zerbitzatuko diren janari-edariak doanikoak izango zaizkie bertaratzen direnei. Guztia, jendea erakartzen lagungarri izango delakoan.

Ikastaroa Mountain Home-ko Bengoechea Hotel historikoan izango da, Euskal Etxearen egoitzaren ondoan, gaur iluntzeko 6:30etatik 8:30ak arte. Irakasleak Boisetik etorriko diren Oinkari euskal dantza tzaldeko gazteak izango dira, tartean Steve Achabal, Xanti Alcelay, Jill Aldape eta Tyler Smith. Trukean ekarpentxo bat egingo dio Euskal Lagunak-ek Oinkari taldeak uda honetan Euskal Herrira egin behar duen bidaiaren poltsari.

Musak Mountain Homen izan dezakeen geroari buruz, Gina Gridley baikor agertu da eta, gaurkoak arrakasta badu, ikastaro gehiago ere egitea ez du baztertzen, badaki-eta, zentzurik onenean, zaleak eta "menpekotasuna" sortzen dituen karta jokoa dela euskaldunen musa.