euskalkultura.eus

Asuncion, Paraguai. Iaz abiatutako bide bati jarraiki, eta beste herrialde batzuetan aspaldi sendotuta dauden moldeei segituz, Euskal Astea hasi da izaten Paraguain ere euskal komunitateari eta Euskal Herriari buruzko arreta deitzeko urteko unerik aproposena, euskaldunak eta euskal jatorrikoak elkarretaratu eta harremanei eusteko aukera on bat izatearekin batera. Aurtengoan, gainera, berez Euskal Asteari dagokion egitarauaz gain, Asuncionen, ekitaldi berezi bat prestatu da datorren larunbaterako San Juan Bautista Herrian, Misiones departamentuan, Paraguaiko bigarren euskal etxea izango denaren jendaurreko lehenengo urrats ageria ematearren.

Hona datozen egunetarako egitarau paraguaitarra, Asunciongo Jasone Euskal Etxetik EuskalKultura.com-i pasatu zaion programaren arabera:

Larunbata, urriaren 20a

-San Juan Bautistako Euskal Etxearen sortze-agiriaren sinadura. Asunciondik hurbilduko direnen kasuan, autobus bat antolatu da, hiriburuko euskal etxetik abiatuko dena goizeko 7:30etan, gutxi gira behera ordubete beranduago iristeko San Juan Bautistara, bertan hiria eta intereseko lekuak erakutsiko zaizkie bisitariei eta Euskal Etxearen sortze-agiriaren sinadurari ekingo zaio
-Ondoren, landa giroko bazkari bat egingo da, Luis Maria Gortariren landetxe eta jabegoan, bertako usadio eta mozkinekin, sinadura ospatzeko

Astelehena, urriaren 22a

-10:00etan: Euskal ordezkaritza bat, Jaurlaritzako ordezkari Elvira Kortajarena gonbidat, David Galeano Oliverarekin bilduko da, Guarani Hizkuntza eta Kulturaren Ateneoan
-19:00etan: Gernikako Bonbardaketari buruzko argazki-erakusketa. Pedro Gamarra Doldan doktorearen hitzaldia eta 'Gernikako Bonbardaketa' dokumentalaren emanaldia, ondoren zintzur bustitze bat eta topa eginez

Asteartea, urriaren 23a

-11:00etan: Euskal ordezkaritzaren bilera Hezkuntza ministrorde Oilda Ortegarekin
-20:00etan: Joseba Gotzon kantariaren emanaldia. Manzana de la Rivera delakoan

Asteazkena, urriaren 24ean

-19:00etan: Estatutuaren Eguna. Hitzaldia eskainiko du Euskadiko ordezkari Elvira Kortajarenak 'Egungo Euskadi' izenburupean. Manzana de la Rivera delakoan