euskalkultura.eus

Buenos Aires, Argentina. Euskal Echea elkartea antolatzaile eta anfitrioi, 2012ko zikloaren azken kontzertua gaur arratsaldean egingo da, hiriburu argentinarreko Euskal Echea institutuko elizan. Bikoteka, Ana Paula Segurola eta Jose Luis de Aquino organistek programa oparoa eskainiko dute Sarandi kaleko egoitzako kaperan. Zikloko azken emanaldirako hautatutako piezak Franz Seydelmann-en eta Ramon Ferreñac-en sonatak, Adolph Hesse-ren Fantasia bat eta Felipe Gorriti-ren Sonata Re Handian izango dira.

Gogora dezagun apiriletik hona hilean behin burutu izan dela kontzertu zikloa, honako musikari eta obra egitarauari jarraituz:

-Apirilaren 13an, Ariel Azkue zuzendari duen ‘Los ministriles’ taldea
-Maiatzaren 11an, Gabriela Navarro Landaverria eta Leonardo Petroni organo-jotzailea
-Ekainaren 8an, Mercedes Garcia Blesa sopranoa eta Ana Paula Segurola organo-jotzailea
-Abuztuaren 10ean, Buenos Airesko Lagun Onak abesbatza (Miguel Pesce zuzendari), Jose Maria Gutierrez txistularia eta Jose Luis Bella organo-jotzailea
-Irailaren 14an, Mario Videla organo-jotzailea
-Urriaren 12an, Abesbatzen kontzertua. Hiriburuko Euskal Echea Institutuko abesbatza (Jose Antonio Cardozo zuzendari), Llavallolgo Euskal Echea-ko abesbatza (Alejandro Hansen zuzendari) eta Maria Cristina Deanna organo-jotzailea

Gaurko errezitalean artista brasildar batek lagunduko du etxeko Ana Paula Segurola, azken aurkezpenean. Jose Luis de Aquino Santa Marcelina Fakultateko graduatua da eta nazioarteko jaialdi askotan hartu izan du parte, hala nola Frantzia, Alemania, Austria, Suitza, Polonia, Italia, Portugal, Holanda, Espainia, Hungaria, Belgika, Argentina, Uruguai, Txile, Mexiko eta Israelen. Gaur egun Sao Pauloko Unibertsitateko Komunikazio eta Arte Musika Eskolako irakaslea da Aquino eta São Bentoko Monasterioko organo-jotzailea. Kontzertua arratsaldeko 6:30etan izango da, Sarandi kaleko 735. zenbakian, sarrera doakoa.