euskalkultura.eus

Llavallol, Argentina. Eguraldi nahiko kaskarra suertatu zen arren, goizeko hamarrak inguruan umeak eta jokuen koordinatzaileak prest zeuden ekitaldiarekin hasteko. Haur guztiak bildu eta adinaren araberako taldeak antolatu ondoren, hasteko seinaleak jo zuen eta talde bakoitzak berarentzat prestatutako joko eta kirolen zirkuitua egiteari ekin zion. Bost urtetik hamabi urte arteko 250 bat ume zelaian zehar sakabanatu ziren eta guztiak ekintza desberdinetatik pasa ziren: 'sokatira', 'lokotx lasterketa', 'txingak', 'irudiak', 'zaku lasterketa', 'toka', 'traba lasterketa', 'zapi sugea' (mukizapiaren bila); 'goxotegia' (gailetatxo lasterketa); 'jantziak' (ahalik eta azkarren janztea); 'zapatila bila' eta 'arrastaka' (poltsez arrastaka ibiltzeko lasterketa), batzuk aipatzearren.

Goiza igaro ahala eguraldiak hobera egin zuen eta eguerdian, jokoak bukatu ostean, antolatzaileek (FEVAko laguntzaileak, euskal etxeetako kideak eta gurasoak) prestatutako freskagarriak eta hanburgesak eskaini zitzaizkien haurrei.

“Iaz baino jende gutxiago etorri da gaur --komentatu zioten Euskalkultura.com-i antolatzaileek– agian eguraldiagatik edo agian Euskal Astea orain dela oso gutxi egin zelako, eta dakigunez, euskal etxe batzuek ahalegin oso handia egin behar dute bidaiak egiteko”. Dena den, hamairu euskal etxetako kideek hartu zuten parte jaialdian:  Arrecifes, Ayacucho, Buenos Aireseko Acción eta Laurak Bat, Cañuelas, Chacabuco, Chascomús, General Rodríguez, La Plata, Lomas de Zamora, Maipú, Mar del Plata, Rosario eta Llavallol eta Sarandí Euskal Echea Ikastetxekoak. Alabaina, ‘Ume Topaketa’ proiektua aurrera doa eta FEVAk dagoeneko datorren urterako gonbidapena bidali du euskal etxe guztiera.