euskalkultura.eus

Villa Maria, Argentina. Martxoaren 23an egindako jai eta elkarretaratze batekin abiatu du 2013ko programa eta aurtengo ekitaldia Villa Mariako Euzko Etxeak. Etxeko kide guztiak zeuden deituta, tartean, ‘Denak Bat’ abesbatzakoak, ‘Jai Alai’ dantza taldekoak eta Pilota eskolako umeak eta izan ere partaidetza aktiboa izan zuten etxeko hiru talde hauetakoek. “Jaia gure egoitzako Zuberoa aretoan izan zen eta arratsaldean zehar dantzez eta giro onaz gozatu ahal izan genuen”, azaldu diote euskal etxeko lagunek EuskalKultura.com-i.

Ekintzen hasiera ofiziala aipatutakoa izan bazen ere, esan beharra dago hilabete hasieran Emakumearen Eguna ere ospatu zela Villa Mariako euskal etxean. Afaria eta ekitaldia martxoaren 8an bertan egin zen eta erakundeko Emakumeen Batzordeak deiturik, andere talde polit bat bildu zen.

[Argentinako beste hainbat euskal etxetan bezala, Villa Mariakoan ere ospatu zen Emakumearen Eguna. Euzko Etxea-ko jaian, zozketak, sariak eta dantzak gailendu ziren andreen gauean (argazkiaEE)]

2013ko Aste Nazionala

Bestalde, Villa Mariako Euzko Etxea-tik Euskal Aste Nazionalaren behin-betiko data plazaratu berri dute. Jakina denez, eta antolatzaileen eskueratik kanpoko arrazoiak tarteko, data bat baino gehiago erabili izan dira Argentinako euskal diasporaren jairik handiena den hitzordu honen aurtengo ediziorako.

[Hilabete batzuk falta diren arren, 2013ko Euskal Astea iragartzen duten nikiak kalean daude jadanik (argazkiaEE)]

Orain, adostasun batera iritsita, elkarretaratzea azaroaren 8tik 10era izango dela iragarri dute behin-betiko. Gogora dezagun 2003an ospatu zela Euskal Astea Villa Marian azken aldiz.