euskalkultura.eus

Santiago, Txile. Euzko Etxea elkarteak ekitaldi ugari egin ditu azken hilabeteotan eta azken asteetan Berriketari aldizkari digitalaren bidez horien guztien berri ematen ari da. Argitalpen honen bidez elkarteko kideek eta lagunek bertan egiten diren ekitaldien informazioa eta argazkiak jasotzen dituzte hilero, eta bertaratu ezin dutenek ere elkartearen egunerokotasunaren jakitun dira.

Azken hilabeteotan Euzko Etxeak egin dituen jardueren artean aipagarria da joan den maiatzaren 25ean egin zen Igo Nazioarteko Dantza Jaialdia. Elkarteko Itxaropen Gaztea dantza taldeak antolatu zuen ekitaldia eta jende aldetik harrera oso ona izan zuen proposamenak. Orain, jaialdiaren osteko emozioak eta poza baretuta, antolatzaileek jardueraren balioespen oso baikorra egin dute, maila artistiko oso handia izan zuela azpimarratuz.

 Euskal-txiletar taldeaz gain, jaialdian kultura desberdinetako gonbidatuek munduko dantzak ekarri zituzten Euzko Etxera: Txileko Iparraldeko folklorea (Aymara kultura) eta Irlandako dantza zeltak. Gainera, Itxaropen Gaztea taldekoek dantza arabiarrak, Pascua irletakoak eta flamenkoa ere eskaini zituzten. Jarduerekin oso gustora gelditu ziren bai antolatzaileak eta baita ikusleak ere eta litekeena da datorren urtean edizio berri bat egitea.

[Amaia Lago eta Maitane Uribe gazteek arabiar dantza erakustaldia eskaini zuten]