euskalkultura.eus

Donostia, Gipuzkoa. Euskadiko Selekzioak aurten Iranen aurka jokatuko du San Mames zelaian, abenduaren 23an, urtero gabonetan jokatu ohi duen partidan. Aurten baina, Euskadi izenarekin jokatuko du Jose Angel Iribar eta Etxarrik zuzentzen duten taldeak. Iaz abenduaren 29an Euskal Herria izenarekin jokatu zuen, Kataluniako selekzioaren aurka, San Mamesen bertan. 1-1 amaitu zen partida, eta Bojanek eta Adurizek sartu zituzten bi golak. Izenaren aldaketari buruz, Iñaki Dobaran Euskadiko Futbol Federazioko presidenteak adierazi duenez, «momentu honetan gehien komeni delako» jokatuko du selekzioak Euskadi izenpean.

Aurkariari dagokionez, Asiako selekziorik indartsuenetakoa da Irangoa, euskal futbolzaleentzat ezagunak diren bi jokalari ere badaude tartean: Javad Nekunam eta Masud Shojaei Osasunako jokalariak. Iranek hiru aldiz irabazi du dagoeneko Asiako Txapelketa. 2005ean 15. geratu zen FIFAk egindako munduko selekzioen sailkapenean, eta orain bi urte Alemaniako Munduko Txapelketarako sailkatu zen.

-Euskadiko Futbol federazioaren webgunea
-ESAITen (Euskal Selekzioen Aldeko Iritzi Taldea) webgunea