euskalkultura.eus

Bilbo, Bizkaia. Bi urte igaro dira Euskal Selekzioak Gabonetako ohiko futbol partida azkenengoz jokatu zuenetik. Jokalari eta Futbol Federazioaren arteko desadostasunak bultzaturiko geldialdi hau amaitu da eta aurten izango da Gabonetako partidaz gozatzeko aukerarik. "Partida hau aro baten amaiera eta berri baten hasiera izatea nahi dugu. Aurten jokatzeko prest gaude, baina aurrera begira beste bide batzuk landu beharko direla uste dugu", esan dute jokalarien arteko iturriek. Izenean ez omen da ados jartzeko arazorik izango, 'Euskal Selekzioa', baina jokalariek euskal selekzioen ofizialtasunaren aldeko pauso eraginkorrak emateko eskatzen diete zuzendariei.

Gaur, Bilboko San Mamesen

Euskal Selekzioak jokatzen duen partida guztietan izan ohi den bezala, aparteko giroa espero da partida baino lehen eta ostean San Mames inguruetan. Jokalariek igorritako mezuan, ofizialtasunaren aldeko aldarrikapen egun bihurtzeko nahia azaldu dute. Partidaren aurretik zelaian argazkia aterako dute, 'Nazio bat' leloarekin eta Zazpiak Bat maparekin.  

Partida gaur gauean jokatuko da Bilboko San Mames zelaian, Venezuelako selekzioaren aurka. 'Vinotinto' izenarekin ezaguna den selekzioaren kontra 2007. urtean jokatu zuen azken aldiz Euskal Selekzioak, Venezuelan bertan. Urtero bezala, partida ETB1 kateak eskainiko du (20:45) eta ondoren 'Selekzio baten ibilbidea' programa berezia ere emitituko du.  ETB-Sat kateak ere zuzenean emango du partida eta ondoren dokumentala.

EuskalKultura Eitbko prentsa sailarekin harremanetan jarri da Canal Vasco-n noiz emitituko den jakin ahal izateko eta jakin ahal izan dugunez atzerapen txiki batekin emango du kate honek partida, hango ordutegira egokitu ahal izateko. Euskal Herriko goizaldeko ordu batetan emango dute (Argentinako arratsaldeko 9ak eta Mexikoko arratsaldeko 6ak, adibidez). Prentsa sailak azaldu digunez, Eitb-ren wegunean ordutegi hauekin eguneratu dute telebista kateen atala.