Chacoko EEaren Maiatzaren 25eko partaidetza irudiak; Kotoiaren Lurra-koek Euskal Zine Zikloari eta euskal abesbatzari ekingo diote bihar

Argentinako Chaco probintziako 'Kotoiaren Lurra' Euskal Etxeak azken asteetan egindako eta datozen egunetan egin beharreko jarduerei buruz eman du aditzera. Iragan maiatzaren 25ean, bertako bazkideek Resistenciako Udalak antolatutako Maiatzaren 25eko aberri desfilean parte hartu zuten. Bihar, bestalde, Euskal Zine Zikloari ekingo dio Euskal Etxeak, 'Aupa Etxebeste' filmearekin, eta bihar bertan baita ere ekingo dio bere lehenengo bilkurari Euskal Abesbatza sortzeko lanean ari den taldeak, interesa izan dezaketen guztiak gonbidatuta daudela.

Resistencia, Argentina. Chacoko euskal komunitateko kideek, Jose Christian Echavarria Euskal Etxeko lehendakaria buru, Maiatzaren 25eko aberri desfilean parte hartu zuten. Euskal parte hartzaile guztiek jantzi tradizionalak soinean ibili zuten probintziako hiriburuan zehar eginiko kabalkada, '2006an Cordoban egindako Euskal Argentinar Aste Nazionalean erabilitako (jantzi) berberak' ziren, baieztatzen dute Euskal Etxetik. Ekitaldi hartan euskaldunek Lapurdiko Inauteria berregin zuten eta maiatzaren 25eko aukera berrian jantziak berriz erakusteko parada izan zuten, kasu honetan Resistenciako biztanleei.

Chacoko Euskal Etxeak Maiatzaren 25a ospatu zuen
['Kotoiaren Lurra' Euskal Etxeko kideak kabalkadan euskal inauteri jantzi tradizionalak soinean]

[Lapurdiko Inauterietako bandera eta jantziak Resistenciako kabalkadan (argazkiak 'Kotoiaren Lurra' Euskal Etxea]

Bestalde, Chacoko Euskal Etxeko arduradunek ekainean ostegunero egingo duten Euskal Zine Zikloa abiatuko dute bihar osteguna. Ekitaldia Resistenciako Hedabideen Museoan egingo da (Pellegrini 213) eta lehenengo hitzorduan Asier Altunak zuzendutako 'Aupa Etxebeste' filmea eskainiko da. Filmeko protagonisten artean hauek aipatu daitezke: Ramon Aguirre, Elena Irureta, Paco Sagarzazu, Iban Garate eta Guillermo Toledo. Emanaldia zortzi t'erdietan hasiko da eta sarrera doanekoa da.

Bihar bertan, azkenik, eta ia tenore berean, Euskal Etxeak sortu nahi duen Euskal Abesbatzan aritzeko asmoa daukatenak bilera batera daude gonbidatuta. Ekitaldia Merkataritza Eskola 9 zenbakidunean egingo da (Av. San Martin 602) gaueko bederatzietan eta Carolina Garcia Ferreira irakasle eta abesbatza zuzendariak gidatuko du jarduera. Garcia Ferreirak Resistenciako Dante Alighieri Institutuko Abesbatza eta Corrienteseko Haurren Abesbatza eta Abesbatza Polifonikoa gidatzen ditu. Talde berrian parte hartzeko ez da esperientziarik behar eta klaseak doanekoak izango dira.

Lotura interesgarriak

Chacoko 'Kotoiaren Lurra' Euskal Etxea
http://www.chaco.gov.ar/centrovasco/

Maiatzaren 25ari buruzko informazio gehiago
http://es.wikipedia.org/wiki/Revoluci%C3%B3n_de_Mayo

euskalkultura.eus

Albisteak

Chacoko EEaren Maiatzaren 25eko partaidetza irudiak; Kotoiaren Lurra-koek Euskal Zine Zikloari eta euskal abesbatzari ekingo diote bihar

Irakurrienak

Azken komentarioak