euskalkultura.eus

Cañuelas, Argentina. Hitzordua bihar eta etzi da Gustavo Arrieta alkate (intendente) daukan Buenos Aires probintziako herri honetan. Arrieta alkateak berak parte hartu izan du aurreko edizioetan, eta hitz batzuk zuzendu dizkie larunbat arratsaldez San Martin plazaren albo batean ezarritako oholtzaren gainetik, festan parte hartu duten dantzariei eta euskal gizataldeko kideei eta, oro har, plazara eta kaleetara euskal musikak eta euskaldunengiroak erakarritako Cañuelasko biztanle guziei.

Dantza taldeei dagokienez, aurten 15 dira --xifra urterik urte gora ari da egiten-- parte hartuko duten dantza taldeak. Horietarik, bi Buenos Aires Hiri Autonomotik etorriak, Ekin Dantzari Taldea eta EAB eta Eusko Ekintzako Dantzariak; eta horiekin batera honako herrietako taldeak: Villa Maria (Córdoba), Rosario (Santa Fe), Paraná (Entre Ríos), eta Buenos Aires probintziako Arrecifes, Laprida, Chivilcoy,  Maipú,  Chascomús, La Plata, Mar del Plata eta Gral. Rodríguez-ko taldeak; eta Cañuelas bertatik, Las Cañuelas Eskolako Euskal Dantza Tailerra eta herriko Denak Bat Euskal Etxeko dantzariak.

Euskal Herritik etorrita, Aiara Dantza Talde arabarreko dantzariak arituko dira. Izan ere, partaidetza horrekin hasiko dute bihartik aurrera eta Argentinako zenbait euskal etxe eta oholtzetan egingo duten bira artistiko laburra. Ikus hemen.

Biharko programa, bestela, 12:30etan hasiko da, ordezkariak Smata aterpetxeko instalazioetara heltzen doazen heinean. Arratsaldeko bostetan, dantzari biltze bat egingo da Denak Bat Euskal Etxearen  egoitzan, herriaren erdigunean, eta sei t'erdietan kalejira herrikoia hasiko da, Euskal Etxeko Danborrada eta dantza talde partide guztiekin San Martin plazara heldu arte.

San Martin plazan ipinirako oholtza gainean, buruzagien hitzak, aurkezpen eta agurrak eta ondoren hurrenez hurren Cañuelaseko estiloko danborrada donostiarra egingo da, eta Elkarretaratzeko partaide diren dantza taldeen erakustaldiari ekingo zaio. Eguna, bertatik hurbil den Euskal Etxearen egoitzan gauzatuko den erromeriarekin bukatu da goizaldeko ordu txikietan, euskal eta argentinar musika egokiro nahasi eta biziaraziz.