euskalkultura.eus

Buenos Aires, Argentina. Euskal Herrian agorrila/abuztuak udako opor hilabete peto-petoa esan nahi badu, Argentina bezalako herri batean --hego hemisferioan-- agorrilak negu gorria nahi du esan, eta hotza. Horrek ez du oztopatzen, ordea, Baionak bere jai nagusiak agorrilean ospatzen baditu, Buenos Airesen ere, jai horien bertsio bat egiterik, izen berarekin gainera 'Baionako Pestak', nahiz eta bertsio egokitua izan. Beraz, Euskal Herriko Baionan festak abuztuaren 3an amaitu baziren, astelehenez, aste horretan bertan, baina asteburuan, ospatu zituzten Buenos Airesko lagunek eurenak.

[Euskal Etxeko Kultura Batzordeko kideetako batzuk eta lagunak (argazkia Cris Cordara)]

[Dantza eta jolasak Euskal Etxeko kantxan (argazkia Cris Cordara)]

Baina jolas eta libertimendu arloko ekimenez gain, Iparraldeko Euskal Etxeak eutsi dio urtean zehar daraman Hitzaldi Zikloari. Abuztuan, hain zuzen, Juan Carlos Ibarrolaren eskutik etorri da, bi saiotan, hilaren 12an eta 19an, Nafarroako historia eta orainari buruz, 'Nafarroa, euskaldunek errege-erreginak zeuzkatenean' izenburupean.

[Hitzaldiratutako jendea, aurkezpena egiterakoan (argazkia Cris Cordara)]

Dagoeneko adierazia den hurrengo deia irailaren 2rako egina du Euskal Etxeak eta Zine eztabaida zikloari dagokio. Egun horretan 'Lo que me contó abuelito' filma emanen da, Agnès Lanusse eta Dominique Gautier-enena. Ordu t'erdiko iraupenez, bearnesen Argentinarako immigrazioa aipatzen du.