euskalkultura.eus

Buenos Aires, Argentina. Euskaltzaleak, Buenos Aireseko Euskara Eskolak, 2009ko ikastaroetarako deialdia ireki berri du. Hasiberrien mailan izena eman nahi dutenentzako eskaintza bikoitza da: alde batetik astelehen eta asteazkenetan izango da ikastaro bat, 19:15tatik 21:15etara, Irene López de Vicuña irakaslearekin; eta apirilean bigarren bat hasiko da, astearte eta ostegunetan 17:00etatik 19:00etara, Marina Arangurenek gidatuta.

Horrez gain, eta ikasleek hala eskatuta, aurtengo berritasuna Euskara eta Euskal Kultura Lantegi bat izango da. Hasiberrientzako mailakoa izango da hau ere, eta Mariana Fernandez Castellik gidatuko du astelehenetan, 18:00etatik 21:00etara. Apirilean hasiko den aipatu ikastaroa ezik, beste guztiak martxoaren 9an hasiko dira. 

Urteko matrikularen prezioa 30 pesokoa da eta hileko kuota, berriz, 40koa. Izen-emateak elkartearen egoitzan egin behar dira: México kaleko 1880 zenbakian, 15:00etatik 19:00etara. Informazio gehiago eskatu nahi izanez gero deitu 4381-4611 edo 4383-1529 telefonoetara edo idatzi e-maila  info@euskaltzaleak.org.ar helbidera.

Datu gehiago elkartearen webgunean: www.euskaltzaleak.org.ar

Zuzendaritza batzordearen berritzea

Era berean, eta Argentinako udako oporrek eragin duten geldialdiaren ostean, Euskaltzaleak-eko arduradunek Zuzendaritza Batzordearen berritzearen berri eman dute. Teresa de Zavaletak presidente lanetan jarraituko du. Karguak horrela gelditzen dira:

-Presidente: Teresa de Zavaleta   
-Presidenteorde: Carlos Saharrea
-Idazkari: Mariana Arla
-Idazkariorde: Carlos Bordagaray
-Diruzain: Graciela Arlegui
-Diruzainorde: Marina Aranguren
-Batzordekide: Juan Luco
-Batzordekide: Belén Girasole
-Batzordekide: Héctor de Inunciaga
-Ordezko batzordekide: Celia Escudero
-Ordezko batzordekide: Liliana Fishter
-Ordezko batzordekide: Juan Carlos Urruspuru
-Kontu ikuskatzaile/FEVAren aurrean euskara arduradun: Elsa Usandizaga
-Kontu ikuskatzaile: Andrés Jaunsolo