Donostia-San Sebastian. ‘Basque. Creativity & Culture’ du izena aste honetan Etxepare Euskal Institutuak aurkeztu duen urtekariak. Proposamenak argi aitortzen du hasieratik “euskal kultura eta sorkuntza garaikidearen bizitasuna munduarekin partekatzearren” sortutako ekimena dela, gure kultura eta sortzaileak nazioartean zabaltzen lagundu nahian. Helburu hori buruan, euskara eta ingelesa izango dira aldizkariaren hizkuntza nagusiak, eta eskuratzea oso erraza izango da Institutuaren webgunean bertan.
Aldizkari berriak “Euskal Herriko kultur ekosistemari buruzko begirada zaindua eta gaurkotua eskaintzen du, sortzaileengan eta tokikoa eta globala bat diren istorioetan arreta jarriz”; eta hori argi islatzen da lehenengo aleko edukietan: tradizioaren eta berrikuntza batzen dituen Zetak fenomeno musikala; belaunaldi sortzaile berriak ordezkatzen dituzten artista bisualak; identitatearen eta diasporaren auziak hizpide hartuta, Gala Knörri egindako elkarrizketa; Etxepare Institutuak sustatzen dituen irakurletzei eta euskal ikasketen katedrei buruzko erreportajea; eta Beleren kultur gomendioak.
“Aldizkaria Etxepare Euskal Institutuko lantaldeak sortu eta koordinatu du, kanpoko sinaduren ekarpenekin eta Kiku Aromiren arte-zuzendaritzapean”, azaltzen dute Tabakaleran egoitza duen Institututik. “Ekimen honekin, Institutuak beste urrats bat eman du kultura nazioartekotzearen eremuan, Euskal Herria Europako kultur eragile garaikide gisa kokatuko duen kontakizun propioa eraikitzearen alde eginez. Gainera, ekimena Euskadi Globalaren kanpo-ekintza estrategiaren baitan kokatzen da”.
‘Basque. Creativity & Culture’ aldizkariak paperezko bertsioa badu ere –azoka profesionaletan, unibertsitateetan eta nazioarteko zirkuitu kulturaletan zabaltzeko tirada mugatua–, apustu nagusia da bertsio digitala; hau PDF formatuan eskura daiteke, era oso errazean, etxepare.eus webgunean.
Etxepare Euskal Institutua Instagramen, etxepareinst.
Lagun bati bidali
Komentarioa gehitu
