euskalkultura.eus

Bartzelona, Katalunia. Ipar Hemisferioko Euskal Etxeek egunotan kurtso berriari ekin diote. Bartzelonako Euskal Etxearen kasuan, euskal kulturaz beteriko ikasturte berriari hasiera eman diote dagoeneko. Lehenengo ekintza, irailaren 1etik 10era arte iraungo duen euskara ikastaro trinkoa izan da. Euskara ikasteko gogoa dutenek, urrian hasiko diren ohiko euskara ikastaroetan izena emateko epea zabalik dute. Euskara ikastarook HABEk arautzen ditu eta Hizkuntzen Europako Erreferentzi Markoaren ildoak jarraitzen dutela azpimarratzen du EEko lehendakari Aitor Arrutik.

Ikastaroez gain, hitzordu berezia dute EEko bazkideek irailaren 11ean. Egun honetan, Kataluniako Aberri Eguna ospatzen da Bartzelonan, eta Euskal Etxean jai honekin bat egin nahi izan dute aurten ere. 'Kalera irtengo gara, euskal eta katalan kulturen anaitasunaren erakustaldi modura', dio Aitor Arrutik. Lluís Companys pasealekuan egongo dira Euskal Etxeko kideak euren lanaz eta euskal kulturaren inguruko informazioa zabaltzeko helburuarekin. Gainera, hauekin batera dantzari, txalapartari eta txistulariak izango dira egun osoan zehar festa giroa alaitzen.

Ikasturte berria, Txoko berria

Bestetik, Euskal Etxeak zerbitzu berriak eskainiko dituen gunea estreinatuko du aurki. Neguan hasitako Txokoaren lanak bukatzear dira. 'Ikasturtea erabat eraberritu nahi izan dugu ere, Txokoan eskainiko diren zerbitzu berriekin', dio Arrutik. Berez, neguan egin ziren hobekuntza lanak baina orain, udan, eman dizkiote azken ukituak elkarguneari. 'Txokoan bazkide eta lagunek pote edo kafe bat hartzeaz gain, pintxo eta ogitartekoak hartzeko aukera izango dute, ETB-Sat bidez euskal futbol taldeak edo pilota partidak ikusten dituzten bitartean; edota Euskal Etxeak eskaintzen dituen formatu txikiko kultur ekitaldiez gozatzen dutela'.

Txokoaren inaugurazio ekitaldia irailaren 18an izango da eta besteak beste, Guillem Joan kantautore katalaren kontzertu akustikoa entzun ahal izango da. Irailaren 23an, berriz, Rafa Rueda euskaldunaren txanda izango da Euskal Etxean, bere azken diskoan bildutako abestiak zuzeneko emanaldian eskaintzeko. Ekitaldi sorta beraz, Euskal Etxeko ikasturtea behar bezala has dadin.