euskalkultura.eus

Donostia-San Sebastián. Eusko Ikaskuntzaren Asmoz fundazioa 'Eusko Ikasgaiak: Zientzia Gizatiarrak, Gizartekoak eta Naturalak' graduondokoan izena emateko epea ireki du. Hamaikagarren edizioa da hau eta aurten ere matrikulazio prozesuaren arduraduna den Itziar Goienetxeak EuskalKultura.com-en bitartez gonbitea luzatu nahi die Diasporako euskaldunei graduondokoan parte hartzeko, horretarako Eusko Ikaskuntzak eskaintzen dituen 20 bekak baliatuz. Beka hauei esker Diasporako ikasleek 1.372,50 euro balio duen graduondokoa doan egin ahal izango dute.

Aurreko edizioetan Diasporako euskaldunen ekarpena oso baliagarria izan da eta antolatzaileek euren ikuspuntu aberasgarria izan nahi dute aurten ere ikastaroan eta ikasleek osatzen dituzten foroetan. EuskalKultura.com-etik, aurreko urteetako ikasleei, Iruzkinen atalean euren esperientziaren berri eman eta ikasle berriak animatzeko gonbitea egiten diegu.

Urriaren 14a arte

Ikastaroan unibertsitate titulazioa duten ikasleek zein titulaziorik gabekoek parte hartu dezakete. Azken hauek, izena emateko orduan, unibertsitate titulua aurkeztu ordez, beste hainbat dokumentuen artean, kurrikuluma ere bidali beharko dute, Euskal Herriko Unibertsitateko Doktoradutzako Azpibatzordeak  'profesional' bezala onar ditzan.

Izena emateko epea urriaren 14a bitartean egongo da irekita. Parte hartu nahi dutenek aurreinskripzioa egin beharko dute sarean, hemen. Edozein arazo edo zalantza argitzeko, idatzi jakinet@asmoz.org e-mailera edo deitu Iziar Goienetxeari 00 34 943 212369 telefonora.

Bekak

- Eusko Ikaskuntzak zenbait beka eskainiko die Euskal Herritik kanpo bizi diren euskaldunei edo euskaldunen ondorengoei. Edozein argibiderako, Graduondoko Idazkaritzarekin harremanetan jarri.

- Nazioarteko Lankidetzaren Agentzia Espainiarrak garapen bidean dauden herrialdeetako ikasleek eska ditzaketen beken deialdia egiten du. Eskaria egiteko epea urtero urriatik abendua bitartean.

- Amerikar Estatuen Erakundeak (OEA) graduondoko ikasketa akademikoetarako eskainitako bekak.

Informazio gehiago:  http://jakinet.asmoz.org