Buenos Aires, Argentina. Hasi berria dugun urri honetan abiatuko du proiektua sukaldari euskal-argentinarrak, ‘Zero kilometroko produktuak’ kontzeptuari jarraituz, Argentina osoko hainbat eskualde bisitatuko ditu –birtualki– Itziar Aguirrek eta “topaketa gastronomiko” bakoitzean tokian tokiko chefekin bilduko da bertako plater bat prestatzeko. Asmoa janariaren bidez bidaiatzea da eta errezeta guztietan Argentinako Patagoniako sagarrekin euskal moldean egiten den Txapela sagardoarekin uztartuko ditu osagaiak.
‘Txapela KM 0’ko saioetan, sukaldariek egingo dituzten platerei buruz ez ezik, eskualde bakoitzeko tradizio eta berezitasunez ere hitz egingo dute Itziarrek eta bere gonbidatuek. “Helburua janari bat prestatzea baino haratago doa, eta sakondu eta ezagutu nahi izango ditugu bertako musika, ohiturak, flora eta fauna...” azaltzen dute Itziar Aguirre eta Xabier Aguirre proiektuaren arduradunek.
Edukiak 10-15 minutuko bideo formatuan iritsiko zaizkio publikoari; Propio egingo dituzte sare sozialen bidez banatzeko, bereziki IGTVn eta Youtuben argitaratzeko, eta Txapelaren (@txapelasidra) eta Itziar Aguirreren (@itziaraguirre) kontuetan ere egongo dira eskuragai
Lehenengo saioa urriaren 20an estreinatuko da, Mar de Platan. Ibilbide gastronomiko birtuala bertan hasi eta Buenos Airesen bukatuko da, tartean Jujuy, Rosario, Mendoza, Puerto Madryn, Calafate, Ushuaia eta beste hainbat geltoki bisitatu ondoren.
Zorterik onena ekimenari eta bere bultzatzaileei!
Lagun bati bidali
Komentarioa gehitu
