euskalkultura.eus

Buenos Aires, Argentina. Urtearen hasieran Magdalena Mignaburuk EuskalKultura.com-en iragarri zituen epeak betetzen ari dira eta Argentinako Euzko Alderdi Jeltzalearen historiari buruzko liburua laster kaleratuko da, aurkezpenak, lehendabizi, Euskal Herrian egingo direlarik, bertako batzoki nagusietan.

Argitalpenaren aurkezpenarekin batera, egileak, Argentinara iritsi zen euskal immigrazioari buruzko hitzaldi bat ere eskainiko du liburuaren aurkezpen ekitaldian. Horrez gain, eta nahiz eta baieztatzeke egon, ‘Euskal Aztarna Argentinan’ erakusketaren 30 panelak jendaurretzeko asmoa ere badu. Liburua ezagutarazteko, Hegoaldeko zein Iparraldeko herri batzuk bisitatuko ditu Mignaburuk eta abenduaren 5etik 8ra Durangoko Euskal Liburu eta Disko Azokan hartuko du parte. Hona hemen, aurkezpenen egitaraua:

-Azaroaren 21ean, Liburuaren aurkezpena eta hitzaldia, Bilboko Sabino Arana Fundazioan
-Azaroaren 22an, Liburuaren aurkezpena eta hitzaldia, Algortako Batzokian
-Azaroaren 25ean, Liburuaren aurkezpena eta hitzaldia, Gasteizko Batzokian
-Azaroaren 27an, Liburuaren aurkezpena eta hitzaldia, Iruñeko Batzokian
-Azaroaren 28an, Liburuaren aurkezpena eta hitzaldia, Donostiako Batzokian
-Abenduaren 2an, Erakusketaren aurkezpena eta ‘Euskal Aztarna Argentinan’-ri buruzko hitzaldia, Hondarribian (baieztatzeke)
-Abenduaren 3an, Euskararen Egunean, hizkuntzak Argentinan koloniaren garaitik hona izan duen presentzia eta bilakaerari buruzko hitzaldi bat eskainiko du Mignaburuk Iparraldean (lekua, baieztatzeke) 
-Abenduaren 5tik 8ra, Durangoko Liburu Azoka
-Abenduaren 9an, ‘Euskal Aztarna Argentinan’-ren aurkezpena eta hitzaldia, Getxoko Kultur Etxean (baieztatzeke)

Argentinara, berriz, datorren urtera arte ez da iritsiko liburua. Helburua 2014ko Buenos Aireseko Liburu Azokan eta La Platako Euskal Astea Nazionalean aurkeztea izango litzateke.

Gogora dezagun proiektu hau Rosarioko Zazpirak Bat euskal etxearen Mendeurrenaren baitan sortu zela, Argentinako EAJ-PNVren idazkari Fernando Lizarbek bultzaturik. Azpimarra daiteke liburua idazteko iturriak Argentinan eta neurri handi batean Euskal Herrian ere bildu dituela egileak, Euskal Herrian Sabino Arana Fundazioan hain zuzen.